“Edi Rama ka protokolluar dorëheqjet e kryebashkiakëve”, Bardhi: Ja mekanizmin që sjell përsëritjen e zgjedhjeve

Numri dy i PD, Gazment Bardhi me anë të një deklarate për mediat ka zbuluar edhe mekanizmin që sipas tij sjell përsëritjen e zgjedhjeve.

“Nëse ka vullnet politik mund të krijohet dispozitë kalimtare, pra ka mekanizma ligjorë që e zgjidhin këtë. Edi Rama e pranon dhe vetë paligjshmërinë e 30 qershorit dhe për rrjedhojë dhe të të emëruarve të tij në krye të bashkive, pasi para kandidimit Edi Rama ka urdhëruar protokollimin e dorëheqjeve e tyre nëse do tu kërkohej” tha Bardhi.

Sekretari i Përgjithshëm i PD u shpreh se PD dhe Lulzim Basha nuk kanë hequr dorë nga aksioni për të realizuar zgjedhje para kohe.

“Nuk ka asnjë tërheqje nga aksioni as nga opozita e bashkuar dhe as nga PD, dhe për rrjedhojë as nga kryetari Basha”, – tha Bardhi
Sipas tij vendi ka nevojë për dënimin e krimit elektoral që në të ardhmen ky fenomen mos të ekzistojë më.

“Duhet vullnet politik sepse mund të preken edhe ligje të tjera përpos kodit zgjedhor. Ka dakordësi mes palëve për të shkuar përtej rekomandimeve të OSBE-së. Nëse pranohen të gjitha kërkesat që opozita ka bërë në tryezën politike garantohen standarde minimale për zgjedhje të lira dhe të ndershme”.

Ndër të tjera Bardhi tha se PD dhe opozita janë të angazhuar plotësisht për të përmbushur një nga kushtet kryesore të bundestagut siç është Reforma Zgjedhore. Kjo do të pasohet sipas tij me zgjedhje parlamentare dhe lokale duke plotësuar kushtin e dytë të Bundestagut që është testimi i Reformës.

Bardhi paralajmëroi se një rasti tjetër kryebashkiaku që po verifikohet pasi janë konstatuar shkelje të ligjit të dekriminalizimit dhe së shpejti do të bëhet publik.

Top Channel