Tre parti në Holandë kërkojnë rikthimin e vizave për shqiptarët pasi sipas tyre, kjo është mënyra e vetme për të frenuar krimin e organizuar shqiptar në vend. Dhe këtij fakti, gazeta më e madhe Holandeze, “De Telegraaf”, i ka kushtuar vëmendje me një shkrim të titulluar
“Kërkesa për viza për shqiptarët”. Sipas policisë holandeze, shkruan gazeta, kriminelët nga vendet e Ballkanit janë gjithnjë e më aktivë në Amsterdam dhe po kontrollojnë tregtinë e kokainës atje. Dhe sipas deputetëve, kjo ndodh se kriminelët përfitojnë kur nuk ka kontrolle. Janë tre partitë holandeze që kanë parashtruar kërkesën për shqiptarët, partia socialiste, partia për liri dhe partia demokristiane.
Deputetja e CDA, Van Toorenburg kërkon rikthimin e menjëhershëm të vizave për shqiptarët dhe thotë” Unë dua të di kë fus në shtëpi. Dhe për këtë arsye do të kërkoj shumë shpejt një debat me ministrin për drejtësi dhe siguri”.Edhe deputeti socialist Van Dijk, ndan të njëjtin mendim duke thënë se duhet të nisin procedura emergjente për rikthimin e vizave.
Shkrimi i “De Telegraaf” vjen një ditë pas vizitës në Shqipëri të ministrit holandez të drejtësisë, Ferdinand Grapperhaus, i cili pavarësisht se u tregua i matur në komente për çeljen e pritshme të negociatave për anëtarësimin e Shqipërisë në BE, dha vlerësime për arritjet e qeverisë së Shqipërisë veçanërisht në Reformën e Drejtësisë.
Top Channel
