“Lufto-Fito”, Salianji nga qelia citon Trump: Ngadhënjimi i ish-presidentit tregoi se asgjë nuk është e pamundur! 17/11 13:07
Kryetari i grupit parlamentar socialist, Taulant Balla, duke folur në Kuvend për situatën e dhunës opozitare në ambientet e jashtme, për të cilat akuzoi Lulzim Bashën si përgjegjës, nxitës dhe orkestrues, foli edhe për një çështje të rëndësishme të ditëve të fundit, atë të hetimit të lobimit demokrat në Shtetet e Bashkuara me parà të dyshuara me origjinë ruse.
“Sot u njohëm me refuzimin e kryetarit të PD-së për t’u paraqitur në institucionin e Prokurorisë. E kemi thënë para pak javësh, që po i lënë mandatet sepse e kanë hallin te Reforma në Drejtësi, por një pjesë e atyre që paguhen për të dhënë opinione thanë: ç’lidhje ka kjo reformë me lënien e mandateve. Sot shqiptarët kanë marrë përgjigjen”, tha Balla.
Hetimi për lobimin, Basha refuzon të shkojë në Prokurori
Lulzim Basha refuzoi të paraqitet këtë të enjte përpara prokurorëve për një hetim. “Ky është rasti i parë sesi kryetari i opozitës, pasi ka lënë mandatin për hir të interesave të vendit dhe jo për të bllokuar Reformën në Drejtësi, nuk respekton detyrimin që ka çdo shtetas, nga Presidenti i Republikës deri te më i thjeshti”, tha Balla.
Arsyetimin e bërë sot publik për këtë refuzim, Balla e quan mosarsyetim.
“Hetimi nuk po kryhet vetëm nga Prokuroria shqiptare, por po kryhet njëkohësisht edhe nga Departamenti i Drejtësisë së Shteteve të Bashkuara të Amerikës dhe nga autoriteti i drejtësisë së Skocisë. Si mund të guxojë dhe të pretendojë besimin e shqiptarëve, kur Prokuroria e njofton për ta marrë në pyetje për një çështje që i ka lënë gojëhapur miqtë tanë perëndimorë, sesi kryeministri në hije paskësh qenë dy vite më parë i sponsorizuar me parà, që nga hetimi i medieve amerikane shkojnë në 950 mijë dollarë, nga të cilat Basha justifikon as 10 për qind të tyre. 90 përqindëshi nuk ka dalë nga Shqipëria, nuk ka dalë nga financat e PD-së”, tha Balla.
Kryetari i grupit socialist përmendi edhe ekskluziven e Top Channel, një ditë më parë, ku u bë e ditur se nga investigimi rezulton se janë edhe dy shtetase të tjera ruse “të përfshira në pronësinë e kompanive guackë, që nga dashuria e madhe për Lulzimin kanë përzgjedhur të mbështesin atë për të financuar fushatat e nxirjes së faqes së Shqipërisë në mediet e ndryshme ndërkombëtare, apo fushatën e promovimit të liderit në zbritje të Partisë Demokratike”, tha Balla.
EKSKLUZIVE/ Lobimi i PD-së në SHBA, të tjerë rusë pjesë e kompanisë “Biniatta Trade LP”
Një ditë më parë Top Channel publikoi ekskluzivisht të dhëna nga hetimi që po zhvillohet në Skoci, i cili ka zbuluar edhe dy shtetase të tjera ruse si pjesë e kompanisë “Biniatta Trade”, e cila ishte ajo që kishte paguar shumën në emër të PD-së te lobuesi amerikan Nick Muzin.
Top Channel
