Nisin votimet në SHBA, ja kur pritet të shpallet fituesi i zgjedhjeve presidenciale 05/11 11:17
Në një njoftim të papritur në mesin e një dite me zhvillime të pafundme, brenda dhe jashtë Parlamentit, kreu i Shtetit shqiptar Ilir Meta ka vendosur të kthejë për rishqyrtim projektligjin për buxhetin e vitit 2019, i miratuar vetëm pak ditë më parë nga shumica qeverisëse në Kuvend.
“Presidenti i Republikës Ilir Meta, duke ndjekur me shumë vëmendje situatën politike më të fundit në vend, si dhe duke vlerësuar konsensusin e gjerë publik mbi kërkesat e studentëve, të cilat janë konsideruar nga të gjithë aktorët politikë si të drejta, legjitime dhe të realizueshme, duke synuar interesin më të mirë në përmbushjen e objektivave sociale të parashikuara në nenin 59 të Kushtetutës, si dhe në garantimin e stabilitetit në vend, me dekretin nr. 10997, datë 13.12.2018 ka vendosur “Kthimin për rishqyrtim në Kuvend të ligjit nr.99/2018 “Për buxhetin e vitit 2019”, me qëllim rishqyrtimin e tij”, thuhet në njoftimin e Presidencës.
Kthimi i “Buxhetit 2019”, Rama: Presion mbi studentët
Presidenti i Republikës shton se ka besimin e plotë, që Kuvendi i Shqipërisë do të reflektojë një bashkëpunim gjithëpërfshirës me qëllim plotësimin e kërkesave të studentëve dhe interesit publik.
Vendimi i presidentit vjen vetëm një ditë pasi kryetarja e Lëvizjes Socialiste për Integrim, njëkohësisht bashkëshortja e tij, propozoi dy amendamente në ligjin për buxhetin, që sipas saj do të përmbushnin menjëherë kërkesat e studentëve protestues.
Ligji për buxhetin u përmend edhe nga kryetari i Parlamentit, Gramoz Ruçi, gjatë seancës plenare të kësaj të enjteje, kur tha se amendamentet nuk mund të merreshin parasysh, pasi ligji ndodhej në Presidencë, duhej të dekretohej fillimisht nga kreu i Shtetit, e më pas të shqyrtohej mbi amendamentet e propozuara.
Top Channel
