Ambasadori izraelit: Marrëveshja për armëpushim me Hezbollahun mund të arrihet brenda ditësh 25/11 11:54
Shtetet e Bashkuara dhe Koreja e Jugut nisën këtë të hënë një stërvitje ushtarake të shkallës së vogël, disa ditë para takimit të planifikuar të Sekretarit amerikan të Shtetit, Mike Pompeo, me zyrtarë koreano-veriorë në Nju Jork.
Programi i Marinës koreane për shkëmbim ka qenë pjesë e stërvitjeve të pezulluara në muajin qershor, pasi presidenti amerikan Donald Trump pati premtuar ndalimin e stërvitjeve ushtarake, pas mbajtjes së samitit me kreun koreano-verior Kim Jong-un në Singapor.
Stërvitjet e mëdha vazhdojnë të jenë të pezulluara, mirëpo Uashingtoni dhe Seuli kanë vazhduar të realizojnë stërvitje të përbashkëta të shkallës më të vogël.
Në stërvitjet e tanishme janë duke marrë pjesë 500 marinsa amerikanë dhe koreano-jugorë, afër qytetit Pohang. Ministri koreano-jugor i Mbrojtjes ka thënë se Seuli dhe Uashingtoni do të vendosin para përfundimit të vitit, nëse do të realizojnë stërvitje masive ushtarake vitin e ardhshëm.
Ndërkohë, Pompeo ka thënë për televizionin “CBS” se, në ditët e ardhshme do të takohet me homologun e tij koreano-verior, Kim Yong-chol, për të diskutuar kërkesat amerikane për denuklearizimin e Penianit, si dhe për plane të tjera, duke përfshirë mbajtjen e një samiti të dytë mes udhëheqësve të të dyja shteteve.
“Shpresoj se do të arrijmë përparim, duke përfshirë përpjekjet për t’u siguruar se do të ndodhë një samit i dytë mes dy udhëheqësve, ku mund të shtyjmë përpara çështjen e denuklearizimit”, ka shtuar ai.
Trump dhe Kim Jong-un patën bërë zotime të mëdha në aspektin e denuklearizimit të gadishullit Korean, por që nga mbajtja e samitit është arritur pak përparim.
Top Channel
