Nis pagesa në Rrugën e Kombit. Tarifë e reduktuar për Kukësin, Hasin dhe Tropojën

Puna në sportele ka nisur me prezencë të policisë. Çdo mjet transporti do të tarifohet sipas kategorisë, motoçikletat kanë çmimin më të lirë, ndërsa kamionët e mëdhenj më të lartin. Autoveturat kanë një çmim prej 5 eurosh, i cili konvertohet në lekë në momentin e pagesës në sportel. Procedura është e njëjtë për çdo mjet.

Ndërkohë, për banorët e zonës së Kukësit, Hasit dhe Tropojës, të cilët kanë një automjet të regjistruar në Drejtorinë Rajonale të Qarkullimit në Kukës, tarifa do të jetë 100 lekë për kalim. Reduktimi i tarifës ishte rezultat i negociatave mes qeverisë dhe koncesionarit pas protestave të dhunshme në muajin mars.

Kësaj radhe, në pikën e pagesës në Rrugën e Kombit nuk kishte protestë. Forcat speciale të ardhura nga Tirana ishin në gjendje gadishmërie, por qëndrimi i tyre nuk qe i nevojshëm. Kundërshtarët e pagesës u mblodhën në qendër të qytetit.

Ibsen Elezi, anëtari i Këshillit Bashkiak të Kukësit nga radhët e PD-së, u shpreh: “Ky tra do të hiqet. Ne do të bashkojmë ekonomikisht Shqipërinë dhe Kosovën. Në mars e zgjidhëm lokalisht problemin, ndërsa tani do ta zgjidhim kombëtarisht”.

Vetë përdoruesit e rrugës janë të ndarë për çmimin.

“Tani do të tarifojë rrugën në Vlorë, Elbasan e me radhë. Aq ishte, sa të fikte flakën e Kukësit”, thotë një qytetar.

Një tjetër deklaron: “Unë jam shumë i kënaqur me 1000 lekë (të vjetra). Rruga duhet të paguhet, pasi nëse nuk paguhet, nuk mirëmbahet”.

Ndërkohë, në një postim në rrjetet sociale, kryeministri Edi Rama falenderonte banorët e Kukësit për mirëkuptimin dhe qytetarinë. Rama tha se kërkonte ndjesë për shqetësimin e krijuar dhe se Kukësi do të bëhet shpejt me aeroport dhe stadium të ri.

Top Channel