Në KPK është duke u mbajtur seanca dëgjimore për anëtarin e Gjykatës së Lartë, Ardian Dvorani. Trupa gjykuese e KPK përbëhet nga Roland Ilia, Etleda Çiftja dhe Firdes Shuli.
Sa i përket elementit të pasurisë, sipas KPK rezulton me një apartament banimi 120 m2, i blerë në 2001 me vlerë 31 mijë dollarë, në bashkëpronësi me bashkëshorten. Gjyqtari i lartë ka të ardhura për blerjen e kësaj pasurie. Gjithashtu, një apartament 104.3 m2 i privatizuar në 1993, i deklaruar nga babai i gjyqtarit. I justifikuar. Autoveturë Scoda 2016 i blerë me “leasing”. Një hua 1 milionë e 350 mijë lekë nga prindërit. Sipas KPK, huaja është deklaruar me burim nga shpërblimi i dhënë nga Gjykata e Tiranës. Likuiditetet e familjes me vlere 9. 9 milionë lekë, Dvorani i ka deklaruar në deklarimet periodike, por nuk i ka deklaruar në Vetting. KPK thotë se ILDKPKI përpara se të hartonte raportin duhet ta thërriste subjektin dhe ta pyeste për sa kohë gjyqtari i lartë ka thënë që është një harresë për shkak të punës, sepse siç rezulton, ai i ka deklaruar në vite këto likuiditete.
Gjyqtari Dvorani është shprehur se pajtohet me gjetjet e KPK, ndërsa shton se nuk është thirrur nga ILDKPI për likuiditetet.
“Pajtohem me gjetjet e KPK, që bazuar në hetimin e thelluar administrativ, me të drejtë është gjetur ndonjë pasaktësi. Është konstatuar që bashkëshortja dhe prindërit kanë likuiditete. Pajtohem me gjetjet. Është fakt që bazuar në informacionin bankar, unë, bashkëshortja dhe prindërit kemi likuiditete. Më rezulton se ILDKPI, gjatë kësaj kohe nuk ka patur asnjë lloj komunikimi. Dua të veçoj se nuk më kanë thirrur asnjëherë nga ILDKPKI, por ligji ia ngarkon inspektoratit këtë detyrim. Komunikimi i parë që kam patur me institucionet e rivlerësimit ka qenë në dhjetor 2017, ku jam njohur me pyetjet e para. Në këtë moment fillova duke shfletuar rubrikat e deklarimit të pasurive dhe konstatova se në kopjen elektronike mungonin katër faqe, ndërkohë që në deklaratën fizike unë i kisha plotësuar. Kjo është pakujdesi, sepse në deklaratat periodike vjetore i kam dorëzuar. Sepse nuk ekziston asnjë motiv, qoftë logjik, qoftë financiar për të fshehur pasuritë. Që nga 2003 e në vijim gjenden të dhënat të plota të deklaruara”, tha gjyqtari.
Sa i përket komponentit të dytë të Vettingut, DSIK thotë që Ardian Dvorani ka përshtatshmëri në detyrë dhe se nuk ka asnjë dyshim për përfshirje në korrupsion.
Më tej, Dvorani u shpreh se në procesin e Vettingut, gjyqtarët dhe prokurorët nuk janë as të pandehur as të paditur. Ai tha se, “në këtë proces nuk synohet vetëm që subjektit i rezervohet e drejta për t’u dëgjuar, por e para ata duhet të sillen me dinjitet, për karrierën e tyre. Sepse integriteti i gjyqtarit e prokurorit nuk vjen vetëm nga salla, por edhe sjelljen jashtë gjyqësorit.
“Nga ana tjetër, ka edhe detyrime për institucionet e rivlerësimit. I tillë duhet të jetë edhe për ILDKPKI. Unë pajtohem tërësisht me gjetjet tuaja. Së dyti, ligji ka caktuar rregulla për gabimet e lapsuset, sepse procesi i Vettingut është një proces administrativ. Më konkretisht, ligji ngarkon që të gjitha palët kanë të drejtë që të dëgjohen e të paraqesin prova. ILDKPKI kishte detyrim ligjor të më thërriste për të më pyetur për këtë paqartësi, sepse kjo është e caktuar qartazi në ligj. Për këtë arsye, kërkoj të rrëzoni përfundimet e ILDKPKI”, tha gjyqtari, i cili kërkoi konfirmim në detyrë.
Vendimi për gjyqtarin Dvorani do të merret nga KPK më 25 korrik.
Top Channel
