Negociatat për anëtarësim, Holanda vendos t’i bllokojë

Parlamenti holandez i kërkon qeverise që të mos shprehet në favor të propozimit të Komisionit Evropian për Shqiperinë, pasi thotë se vendi ynë nuk ka plotësuar pesë kushtet e vendosura nga Brukseli, ndërsa theksin e vendos tek lufta ndaj korrupsionit dhe krimit.

“Duke vënë në dukje se Shqipëria në mënyrë të qartë nuk i përmbush pesë kushtet e përcaktuara në bazë të këtij raporti të progresit, sepse nuk ka histori në reformën ligjore, në luftën kundër korrupsionit dhe në luftën kundër krimit. Vëren se në bazë të këtij progres-raporti nuk mund të hapen negociatat për pranim. Qeveria holandeze nuk duhet të votojë në favor të propozimit të KE për hapjen e negociatave”, thuhet në mocionin e miratuar në Dhomën e Përfaqësuesve të Holandës, të hartuar nga Van Helvert, Omtzigt, Anne Mulder, Van der Graaf.

Më herët ishte gazeta holandeze “De Telegraff” që njoftoi se Holanda ka vendosur të bllokojë hapjen e negociatave dhe ky është mesazhi që shumica e dhomës së përfaqësuesve do t’i dërgojë përmes qeverisë në samitin e radhës të ministrave të jashtëm të BE.

Deputetët e partive VVD, CDA, CU, PVV, SP dhe 50Plus kishin deklaruar se do të votonin kundër hapjes së negociatave të BE me vendin tonë dhe Maqedoninë me argumentin se ende nuk është bërë sa duhet në luftën kundër korrupsionit e krimit të organizuar.

“Kemi një shqetësim serioz për luftën kundër korrupsionit dhe krimit të organizuar në Shqipëri”, ka deklaruar ministri i Jashtëm, Stephanus Abraham Blok. Gazeta thotë se kjo është edhe arsyeja se përse gjashtë parti parlamentare bashkuan votat për ta ndaluar qeverinë që të pranojë hapjen e negociatave me vendin tonë.

Sipas deputetëve skeptikë, ka progres në Shqipëri, por ecuria e dobët e procesit të vetingut, nuk është bindëse për hapjen e negociatave.

“Po ka progres në Shqipëri, si për shembull me reformën në gjyqësor, por nga 800 gjykatës vetëm 10 janë testuar. E me këtë me këtë nuk mund të thuash që vendi është gati për hapjen e negociatave”, ka deklaruar Deputeti i CDA, Van Helvert, para votimit në Parlament.

“De Telegraaf”, shkruan se vetëm dy parti parlamentare, D66 dhe GroenLinks janë dakord për hapjen e negociatave me Shqipërinë dhe Maqedoninë dhe ato besojnë se dy shtetet ballkanike do angazhohen seriozisht për sundimin e ligjit dhe luftën kundër krimit e korrupsionit nëse do të kenë një perspektivë të qartë pranimi. Holanda ishte një nga tre vendet skeptike përhapjen e negociatave te Shqipërisë me Bashkimin Evropian.

Top Channel