Këngëtari grek Notis Sfakianakis mbajti koncertin e tij të parë recital në Shqipëri, në Pallatin e Kongreseve, mbrëmjen e së enjtes.
Në një sallë të mbushur plot, publiku shijoi hitet e tij të reja dhe të kahershme, shoqëruar me një performancë të kuruar në detaje nga vetë këngëtari, orkestra që e shoqëronte apo edhe trupa e baletit.
Publiku shoqëroi Sfakianakin pothuajse në çdo këngë, duke realizuar atë që më herët ai kishte shprehur se do të donte të këndonin të gjithë në atë sallë.
Për më shumë se tre orë këngëtari interpretoi para publikut, duke harruar atë debat të gjatë që kishte paraprirë koncertin e tij.
Asgjë nuk e ndali këtë koncert, u shpreh ai, duke përforcuar edhe një herë atë që kishte shprehur edhe më herët për Top Channel. “Shqiptarët nuk i kam ofenduar kurrë, janë një komb i lashtë e me histori”, pati thënë Notis.
Disa prej njerëzve më të ngushtë me të cilët ai ka bashkëpunuar, po ashtu janë shqiptarë. Në një komunikim të shkurtër me të pranishmit, 58-vjeçari e tregoi se vitet nuk kanë asnjë rëndësi, por energjia e tij në skenë u përçua kudo. Në një skenë ku pak rëndësi ka gjuha, e më shumë muzika.
Notis Sfakianakis e tregoi se ishte këtu për muzikën e tij, jo për deklarata politike. Dhe po për muzikën publiku e duartrokiti gjatë. Duke i pranuar edhe rebelimin e tij në skenë, nëpërmjet humorit dhe batutave që bashkëshoqëruan koncertin.
Top Channel
