Masat tregtare të marra nga Presidenti Trump kanë nxitur reagime në mbarë botën, ku ai më i ashpri është i Kinës, që i është përgjigjur me të njëjtën monedhë.
Gjithsesi kundërpërgjigja e Kinës nuk është mjaftuar me kaq, pasi ditët e fundit zëvendës ministri i Tregtisë ka takuar një sërë ambasadorësh të vendeve të Bashkimit Europian.
Ai ka kërkuar që edhe BE-ja të bashkëpunojë me Kinën, për të kundërshtuar me forcë masat tregtare proteksioniste, të marra nga Shtetet e Bashkuara të Amerikës.
Presidenti Donald Trump kërcënoi muajin e kaluar se do të vendosë tarifa me vlerë 150 miliardë dollarë për mallrat e importuara nga Kina, një lëvizje kjo e komentuar si ndëshkim për politikat industriale agresive të Pekinit në dëm të amerikanëve.
E teksa tensionet rriten, qeveria kineze po përpiqet të fitojë terren në sistemin e tregtisë globale, duke përfituar edhe nga shqetësimet e vendeve të Perëndimit për politikat e Trump.
Sipas agjencisë së lajmeve “Reuters”, takimet e ngutura të zyrtarit kinez me ambasadorët e Francës, Gjermanisë, Spanjës, Italisë dhe Mbretërisë së Bashkuar tregojnë se Kina po përpiqet të ngrejë një mur për të izoluar masat agresive të Trump, të cilat, sipas diplomatëve europianë, Pekini i kishte nënvlerësuar.
Top Channel
