Çfarë po ndodh me qendrën e Tiranës? Tirana e italianëve të Musolinit dhe ajo e italianëve të Edi Ramës. Oligarkët e kullave dhe kullat e oligarkëve… Varianti inteligjent i Erion Veliajt për qendrën e Tiranës.
Për këto çështje u diskutua mbrëmjen e sotme në “Të Paekspozuarit” në Top Channel.
Gazetarja Ornela Liperi u pyet se nga vijnë paratë që shkojnë për ndërtime në Tiranë. Ajo u shpreh se vetëm gjatë vitit 2018 është parashikuar të investohen rreth 300 mln euro në ndërtime, ndërsa deri në 2020, kjo shumë është 800 milionë euro.
“300 mln euro janë vetëm për vitin 2018. Në Tiranë do të investohen rreth 800 milionë euro brenda 3 viteve, të mbledhura nga llogaria e të të ardhurave të grumbulluara nga Bashkia e Tiranës”, tha Liperi.
Më tej, gazetarja shprehet se e rëndësishme është se nuk ka një rritje të madhe të kredisë bankare, ndërsa për këtë jep edhe arsyetimin, ndërsa specifikon se këto para nuk vijnë nga bankat.
“Nuk ka ndonjë rritje të madhe të kredisë bankare dhe kjo është e rëndësishme, se nga vijnë këto para është pak e vështirë të kuptohet, por këto para nuk po vijnë nga bankat, këtë po them. Bankat janë të stepura për të kredituar sektorin e ndërtimit, pasi ndër të tjera edhe shumat e kërkuara janë të mëdha dhe nuk mund të jepen nga një bankë e vetme”.
Ornela Liperi thekson se nuk ka asnjë fuqi blerëse, pasi sipas saj çmimet do të jenë të larta. “Nuk ka një fuqi blerëse në vend për kullat pasi do të shiten me rreth 2 mijë euro metri katror. Sipërfaqe minimumi 100 metra katror dhe kostoja shkon diku te 200 mijë euro. Është e pamundur për një familje me të ardhura mesatare”, thotë Liperi.
Arkitekti, Bregasi sqaroi se për një leje ndërtimi prezantohet një plan biznesi, në të cilin mund të pasqyrohet se investimi do të bëhet me kredi.
Ndërsa Liperi shton se disa firma ndërtuese nëse kontrollohen në QKR shikon se janë “fantazmë”, pasi nuk kanë asnjë buxhet.
Sipas Andi Bushatit, po kryhet një krim i disafishtë, pasi siç shprehet ai: “Kur kullat po jepen, kur 170 leje po jepen dhe cash-i nga bankat mungon, mendja të shkon se po flitet për flukse parash informale. Hajde po e pranojmë edhe këtë, mbyllëm sytë për kaq vite për ekonominë kriminale. Po cfarë po bëhet? Pasi kemi bërë krimin e parë, të cashit të parave informale, në vend që këtë ta drejtonim në një ekonomi të shëndoshë, po e bëjmë me ndërtimin e kullave në Tiranë, ku fitimi për qeveritarët është i shpejt. Këto janë fryti i një deliri fluturak të pushtetit, për të lënë Edi Rama dhe Erion Veliaj gjurmët e tyre.”
Për Gjergj Bojaxhi, nuk ka një transparencë për publikun dhe sipas tij, Kryeministri ka marrë kompetancat e pushtetit lokal.
Ka një mungese transparence. Kryeministri ka marrë kompetancat e pushtetit lokal dhe me të drejtë sepse për këto qendra të rëndësishme duhet një filtër nga Këshilli i Ministrave, por duke mos kaluar në procedurë normale evitohet transparenca me publikun. Nëse do të respektohej plani urbanistik, nuk do të ndërtoheshin aq afër njëra-tjetrës kullat.
Top Channel
