Forumi për Liritë akademike dhe autonominë universitare në një deklaratë pas takimit me kryeministrin ka kërcënuar me grevë të përgjithshme.
Në një deklaratë të këtij forumi thuhet se, takimi nuk ishte ne përgjigje të kërkesave që i ka paraqitur publikisht kryeministrit.
Ky forum thuhet në deklaratë nuk i ka kërkuar kryeministrit të marrë rolin e kryetarit të senatit apo të organeve të zgjedhura të UT-së.
“Forumi nuk i ka kërkuar qeverisë që t’i heqë veshin burokracisë universitare dhe as shndërrimin e saj në palë për larjen e hesapeve mes klaneve të brendshme, por hapjen e një dialogu me profesoratin, studentet dhe shoqërinë shqiptare për marrjen e përgjegjësisë që i takon qeverisë, për një bashkëndarje të përgjegjësisë për degradimin e arsimit të lartë dhe mosfunksionimit te ligjit në fuqi”.
Deklarata e plotë
Forumi për Liritë Akademike dhe Autonominë Universitare ndoqi takimin e kryeministrit Edi Rama dhe të ministres së Arsimit dhe Shkencës znj. Lindita Nikolla me senatin e Universitetit të Tiranës.
Forumi mendon se ky takim nuk është në përgjigje të kërkesave që ne kemi paraqitur publikisht pasi forumi nuk i ka kërkuar Kryeministrit që të marrë rolin e kryetarit të senatit apo të organeve të zgjedhura të UT-së. Forumi nuk i ka kërkuar qeverisë që “t’i heqë veshin burokracisë universitare” dhe as shndërrimin e e saj në palë për larjen e hesapeve mes klaneve të brendshme, por hapjen e një dialogu me profesoratin, studentët dhe shoqërinë shqiptare për marrjen e përgjegjësive që i takojnë qeverisë dhe jo vetëm qeverisë, pra për bashkëndarjen e përgjegjësisë për degradimin e gjendjes së arsimit të lartë në vend dhe mosfunksionimin e ligjit për arsimin e lartë.
Forumi nuk ka pasur një kërkesë formale të ardhur nga kryeministri, por edhe sikur të kishte pasur, një takim i tillë pa axhendë të përcaktuar do të ishte krejt i padobishëm. Arsimi i lartë në Shqipëri nuk mund të shndërrohet në show ai është tashmë një dramë. Një dramë për ne profesoratin, për studentët dhe shoqërinë, një dramë që shpaloset sot para syve të kujtdo me përjashtim të kryeministrit dhe ministres. Një dramë që nesër mund të shndërrohet në tragjedi për dijen dhe vendin. Forumi refuzon gjuhën shantazhuese dhe tallëse, por megjithatë të shqetësuar më shumë se prej talljeve apo kërcënimeve, nga gjendja dramatike dhe problemet e mprehta të pazgjidhura që vazhdojnë të shtohen pafundësisht, shpreh vullnetin për dialog të cilin përveçse publikisht do ta adresojë edhe në mënyrë zyrtare.
Grupi i negocimit i zgjedhur nga pjesëmarrësit e forumit, pret me seriozitet një përgjigje. Forumi mbetet i palëkundur në vullnetin e tij që në rast refuzimi, të bashkuar me studentët tanë të shkojmë drejt një greve të përgjithshme.
Kordinatori i Forumit
Prof ass Dr Mark Marku
Top Channel
