Ishin të bllokuar në një minierë në Afrikën e Jugut, por 955 minatorët u shpëtuan dhe dolën që aty shëndoshë e mirë.
Ata qëndronin nën tokë prej dy ditësh, që pas një defekti në rrjetin elektrik që paralizoi ashensorët e minierës.
Autoritetet lokale dhe ato të minierës thanë se, minatorët janë që të gjithë mirë dhe nuk kanë asnjë problem fizik.
Incidenti ndodhi në minierën e arit “Beatrix” në Welkom, një nga më të mëdhatë në vend. Afrika e Jugut është një prej prodhuesve më të mëdhenj të arit në botë, por standardet e sigurisë shpesh vihen në dyshim.
Megjithatë, në këtë rast duket se siguria ka funksionuar mjaft mirë dhe minatorët u shpëtuan që të gjithë.
Drejtuesit e minierës thanë se elektriciteti u ndërpre, pasi u rrëzuan disa shtylla jashtë impiantit nga një stuhi e fuqishme, gjë që nuk është në dorën e kompanisë.
Ndërsa minatorët prisnin të shpëtoheshin, shqetësimi kryesor ishte ajrosja, që duket se ka qenë në nivelin e duhur, përderisa thuajse 1.000 të mbyllur në një vend nuk patën probleme me frymëmarrjen.
Top Channel
