Mandati i 2 deputetëve, KQZ kërkon informacione shtesë nga Prokuroria

“Me detaje nuk e mbaj mend këtë histori. Po bëhen gati 20 vite. Nuk kam pasur në asnjë moment një urdhër ndalimi. Nuk kam pasur në asnjë moment arrestim, hetim, gjykim. Apo çfarëdolloj mase tjetër në Itali”, u shpreh Gledion Rehovica, deputet i LSI.

Aqif Rakipi i PDIU mungoi, por avokati Theodhori Sollakun erdhi me të njëjtat pretendime si Rehovica. “Prokuroria thotë se subjekti që unë mbroj nuk ka deklaruar se ka qenë ndonjëherë në gjykim apo hetim në ndonjë autoritet i huaj. Asnjëherë nuk ka qenë”, u shpreh ai.

Termi “i raportuar” i përmendur në kërkesën e prokurorisë për të dy deputetët ka krijuar paqartësi.

“A në shtetin italian ndonjë procedim penal të filluar, të dërguar në gjyq, të filluar e të pushuar. Apo të mos ketë filluar fare…?”, u shpreh Gëzim Veleshnja, përfaqësues i LSI në KQZ.

Avokatët dhe katër anëtarët që përfaqësojnë LSI dhe PS në KQZ votuan për t’i kërkuara sqarime Prokurorisë së Përgjithshme. Kundër ishin Klement Zguri dhe Vera Shtjefni.

“Verifikimi i të dhënave sipas ligjit, por edhe kualifikimi i tyre janë kompetenca të Prokurorisë së Përgjithshme. Të cilat ja sjell organit kompetent përmes konkluzioneve, të cilat ne i kemi përpara”, u shpreh kreu i KQZ, Klement Zguri.

Ndërkohë pa pritur vendimin e KQZ-së, Prokuroria e Përgjithshme kallëzoi Rakipin e Rehovicën në prokurorinë e krimeve të rënda për falsifikim dokumentesh.

Deputetët nuk kanë deklaruar në formularin e dekriminalizimit se janë raportuar në Itali për veprën penale të “marrjes së mallrave të vjedhur” dhe të “Vjedhjes” së një dyqani, për të cilat, përkatësisht Aqif Rakipi dhe Gledion Rehovica, rezultojnë me emra të tjerë, edhe ata të padeklaruar.

KQZ pret më shumë sqarim edhe për kreun e Bashkisë Pogradec, Eduart Kapri edhe pse sipas Prokurorisë së Përgjithshme nuk është në kushtet e ndërprerjes së mandatit.

Me votimin e fundit ish-deputetët Mhill Fufi dhe Omer Mamo zyrtarisht nuk janë subjekte dekriminalizimi.

Top Channel