![](https://top-channel.tv/wp-content/uploads/2024/07/ramaa_sd-1-800x450.jpg)
Shtohen telashet për sportin rus për të cilin bien ndjeshëm shanset për pjesëmarrjen në Lojërat olimpike të Pyeongchangut që do të mbahen vitin e ardhshëm. Agjencia Botërore Antidoping ka mbajtur në fuqi vendimin e pezullimit të asaj Ruse, ndërkohë që IOC në mbledhjen e 5 dhjetorit në IOC do të marrë vendimin përfundimtar për Rusinë.
WADA e mori vendimin e saj për Agjencinë Ruse Antidoping pas një mbledhjeje të zhvilluar në Seul për të shpjeguar më pas edhe motivet e saj në arritjen e këtij përfundimi. WADA bëri të ditur se një prej arsyeve për lënien në fuqi të pezullimit të RUSAD ishte e lidhur me faktin se autoritetet politike e sportive ruse refuzuan të pranojnë përfshirjen në këtë skandal të madh të dopingut. Por jo vetëm kaq, së fundmi ka filluar të qarkullojë lajmi për zhdukjen e testeve pozitive me doping në Sochi 2014 të sportistes së Curling, Ekaterina Galkina e cila në këtë moment nuk është nën hetimin e IOC.
Agjencia Ruse antidoping reagoi ndaj këtij vendimi të WADAs nëpërmjet Drejtorit të Përgjithshëm të saj, Yuri Ganus.
“Ne i plotësuam të gjitha kriteret që vareshin nga ne”-tha Ganus-“i përmbushëm të gjitha kriteret e vendosura për ne. Ishin 2 pika që shkonin përtej të kompetencave tona dhe që ne për fat të keq nuk i plotësuam dhe WADA mori vendimin pikërisht duke u bazuar në këtë fakt”.
Lojërat Olimpike Dimërore të Pyeongchangut do të zhvillohen në periudhën 5-25 shkurt të vitit të ardhshëm.
Top Channel