Gishtin e mesit Trumpit, shkarkohet nga puna

Juli Briskman po shëtiste me biçikletë në Virginia muajin e kaluar, kur bëri xhestin si një reagim ndaj politikave të Trump.

“Ai po më kalonte pranë dhe gjaku nisi të më vlojë. Mendova, përfituesit e DACA-s do të dëbohen. Obamacare do të zëvendësohet. Vetëm një e treta e Porto Rikos ka energji elektrike, ndërkohë që ai po shkonte në fushën e golfit, sërish”, tha ajo ndërsa shpjegonte xhestin.

Një fotograf që udhëtonte me autokolonën presidenciale fiksoi foton dhe imazhi shumë shpejt u përhap në mediet e shtypura dhe ato sociale.

Shumë e përshëndesnin Briskmanin, e madje e quanin edhe heroinë, e të tjerë thonin se ajo duhej të kandidonte në zgjedhjet e vitit 2020. Ajo punonte si specialiste marketingu dhe komunikimi për një kompani në Virginia, nga e cila tani është shkarkuar, pasi sipas drejtuesve xhesti i saj kishte qenë i papërshtatshëm.

Sipas saj, kompania ishte zemëruar pasi ajo e kishte bërë imazhin foto profili në “Twitter” dhe “Facebook”, e kjo mund të dëmtonte reputacionin e kompanisë si kontraktore qeveritare.

Virginia ka ligje “elastike” punësimi dhe punëdhënësit në sektorin privat mund të pushojnë njerëzit nga puna për çdo arsye. Pas daljes nga klubi i golfit në Virginia, autokolona e Trump u ndesh edhe me një këmbësor që e përshëndeti me gishtin poshtë, në shenjë mosaprovimi.

Ndërsa një grua tjetër qëndronte në hyrje të klubit, me një tabelë në dorë ku shkruhej “në hetim”. Por, sidoqoftë, ajo që e ka pësuar është 50-vjeçarja Briskman, që krejt papritur e gjen veten tani duke kërkuar një vend të ri pune.

Top Channel