Pas publikimit të një raporti në emisionin investigativ “Fiks Fare”, që dëshmonte për nivele të larta të ngarkesave mikrobike si dhe numrin e lartë të infeksioneve spitalore, ka reaguar zëvendësministrja e Shëndetësisë.
Mira Rakacolli, e cila shpjegon se pas koncesionit të sterilizimit në sallat e Kirurgjisë në QSUT infeksionet spitalore janë përgjysmuar pasi në vitin 2015 përllogariteshin në masën 30%.
“Pikërisht për këtë bëmë dhe partneritetin publik privat për sterilizimin dhe rezultatet ishin të menjëhershme, pasi nga 2015 në 2017 i kemi çuar ne 12%, pra i kemi përgjysmuar. Ndaj në këtë projekt do ta shtrimë së shpejti në të gjithë spitalet në vend”, shprehet Mira Rakacolli , zëvendësministrja e Shëndetësisë.
Por Rakacolli infeksionet spitalore i lidh dhe me kushtet higjieno-sanitare të sallave dhe spitaleve, te të cilat do të ndërhyjnë me aksionin e lançuar për 100 ditëshin e parë të qeverisë “Rama 2”.
“Infeksionet lidhen ngushtë me ndotjen e ambientit. Ndaj dhe aksioni i lançuar nga ministrja nuk ka të bëjë vetëm me pastrimin e territorit të jashtëm, por me ndërhyrjet që do të bëhet në të gjithë spitalet për krijimin e kushteve higjieno-sanitare, sipas standardeve”, thotë Rakacolli.
Por si mjeke, Rakacoli kërkon edhe bashkëpunimin e qytetarëve, të cilët shpesh gjatë vizitave të tyre te pacienti i shtruar shërben si burim i transmetimit të mikrobeve nga jashtë brenda, duke mos respektuar dhe ata vetë rregullat e higjienës apo duke refuzuar veshjet e posaçme kur takohet një pacient që ka kryer ndërhyrje.
Top Channel
