U19, Bogdani ul pritshmëritë: Nuk kemi objektiv kualifikimin

25/09/2017 00:00

Përfaqësuesja U19 ka filluar grumbullimin për t’u përgatitur për ndeshjet kualifikuese të kampionatit europian.

Në konferencën për shtyp përpara këtij aktiviteti, trajneri Erjon Bogdani nuk ka dashur të ushtrojë presion ndaj lojtarëve, duke përjashtuar objektivin sportiv të skuadrës në këto ndeshje.

“Federata dhe unë nuk kemi ndonjë objektiv kryesor për kualifikim në këto kualifikuese. Për këtë arsye, ne kemi si qëllim që të luajmë sa më mirë, të marrim maksimumin dhe të prodhojmë sa më shumë lojtarë për ekipin Shpresa, apo Kombëtaren U21 dhe Kombëtaren A”, tha Erjon Bogdani, trajner i Kombëtares U19.

Shqipëria ndodhet në grupin e 12 në këto kualifikuese, së bashku me Malin e Zi, Norvegjinë dhe Ukrainën. Ndeshjet do të luhen në stadiumin “Selman Stërmasi”, duke filluar nga ajo me Ukrainën më 4 tetor, për të vazhduar më pas më 7 tetor me ndeshjen përballë Malit të Zi, e më 10 tetor ndeshja e fundit kundër Norvegjisë.

Ndërkohë, në fillim të muajit tetor do të zhvillohen edhe dy ndeshjet e fundit të kualifikuese të Botërorit “Rusi 2018”, të përfaqësueses A kundër Spanjës dhe Italisë, për të cilat Bogdani mendon se kemi shpresa për të marrë pikë.

“Mendoj se ndaj Italisë, në ndeshjen që do të luajmë në Shkodër, kemi mundësi që të bëjmë një paraqitje të mirë dhe të marrim një rezultat pozitiv, ndërsa kundër Spanjës nuk kam shpresa”, tha Erjon Bogdani.

Top Channel

BILETA Portokalli - AG SHOW - Bileta