Belshi pa ujë. Nis aksioni për të prerë lidhjet e paligjshme

Nisur nga situata e një viti më parë, kur bashkia u detyrua të furnizojë popullatën me bote uji, këtë vit është ndërmarrë një aksion për ndërprerjen e lidhjeve të paligjshme, çka ka përmirësuar disi furnizimin.

Endri Pepa, drejtor i Ujësjellësit Belsh, shprehet: “Krahasuar me një vit më parë, jemi më mirë. Nga ana e Ujësjellësit dhe bashkisë janë ndërmarrë disa masa që kanë të bëjnë me ndërprerjen e lidhjeve të paligjshme dhe ndërhyrjen në disa pika të amortizuara”.

Problem për Bashkinë e Belshit mbetet fshati Kosovë, ku ndodhet edhe instituti i vuajtjes së dënimit, i cili rrezikon të mbesë totalisht pa ujë të pijshëm.

“Pika më problematike është fshati Kosovë, që furnizohet nga një burim i veti dhe burimi është gati duke u tharë. Aty është edhe burgu me 160 persona që vuajnë dënimin dhe ne nuk po mundemi dot ta përballojmë këtë emergjencë”, shton Pepa.

Furnizimi me ujë i qytetit të Belshit ka qenë kompetencë e Ujësjellësit Fshat të Elbasanit, kompetencë e cila tashmë u ka kaluar bashkive. Megjithë ndërhyrjet e pjesshme, qytetarët mund të furnizohen vetëm me 1-2 orë ujë të pijshëm në ditë.

Bashkia e Belshit ka gati projektin i cili parashikon 24 orë ujë, projekt i cili pret financimin.

Top Channel