Paris Saint Germain nuk e ka mbyllur çështjen e blerjeve në merkaton e kësaj vere, pavarësisht ardhjes së Neymar.
Klubi parizien vazhdon të ketë në qendër të vëmendjes Kylian Mbappe, për të cilin Monaco kërkon 180 milionë euro. Për 18-vjeçarin, klubi që ka avantazhin deri tani është Reali i Madridit, kjo edhe për faktin se Mbappe admiron Cristiano Ronaldon dhe dëshiron të luajë përkrah tij.
Por problemi për “Los Blancos” qëndron te koha. Reali i Madridit preferon që Mbappe të qëndrojë edhe një sezon te Monaco, ndërsa Paris Saint Germain i dëshiron që tani shërbimet e tij, për të krijuar një treshe sulmuese me Cavanin e Neymar.
Megjithatë, edhe transalpinët kanë problemet e tyre, ku më i madhi është ai ekonomik. Francezët duhet të gjejnë një mënyrë për të evituar rënien në kurthin e “Fair Play”-t financiar. Pasi shpenzoi 222 milionë euro për Neymar, Parisit i duhet me çdo kusht që të shesë futbollistë.
Sipas “Le Parisien”, 3 futbollistë e kanë të sigurtë largimin nga kryeqyteti francez, e ata janë Krychowiak, Jese dhe Aurier, megjithatë, ai nga i cili mund të përfitojë më shumë PSG është Di Maria, të cilin e vlerëson 70 milionë euro.
Së fundi u fol për një interes të Barcelonës për argjentinasin, por bindja duket se nuk është shumë e fortë te katalanasit. Ai që u dëmtua më shumë nga ardhja e Neymar është pikërisht Draxler. Gjermani u ble para 8 muajsh për 40 milionë euro dhe fitoi zemrat e tifozëve, por ardhja e brazilianit i hap dyert e largimit nga “Parc des Princes”. Këtë fundjavë, agjenti i tij u pa në Barcelonë dhe mediet gjermane e shohin atë si futbollist të skuadrës katalanase.
Top Channel
