Xhamajka humbet sërish një garë të sprintit në Botërorin e atletikës që po zhvillohet në Londër, dhe bëhet fjalë për atë të 100 metrave për femra.
Në këtë disiplinë ishte amerikania Tori Bowie ajo që triumfoi, duke marrë medaljen e artë me kohën 10.85 sekonda, e duke lënë në vendin e dytë Marie-Josee Ta Lou nga Bregu i Fildishtë, ndërkohë që medaljen e bronztë e fitoi Dafne Schippers.
Elaine Thompson ishte ajo që zhgënjeu më shumë, pasi xhamajkania e mbylli garën jashtë zonës së medaljeve.
Në shtatëgarëshin për femra, medaljen e artë e fitoi belgia Nafissatou Thiam, duke lënë pas gjermanen Carolin Schafer dhe holandezen Anouk Vetter.
Në kërcimin me shkop për femra, titulli botëror i shkoi grekes Katerina Stefanidi, me 4.91 m, që përbën edhe një rekord kombëtar për të.
Ndërsa në hedhjen e gjyles për meshkuj, Zelanda e Re siguroi medaljen e artë me Tomas Walsh, i cili në tentativën e fundit realizoi hedhjen prej 22.03 metrash.
Top Channel
