Një grup anëtarësh të forumeve të PD dhe deputetë të kësaj partie kanë dalë me një deklaratë të përbashkët ku thonë se zgjedhjet e 25 qershorit shënuan disfatën më të rëndë zgjedhore në historinë e Partisë Demokratike.
Për ta, rezultati ishte pasojë e blerjeve masive të votave me paratë e drogës dhe përfshirjes së krimit në proces zgjedhor, por edhe pasojë e gabimeve të rënda të Partisë Demokratike.
Ky grup kerkon garë te hapur, me rregulla të drejta e të paanshme, me analizë dhe debat alternativash, me konkurrim real dhe respekt e gjithëpërfshirje për sfidantët, si kusht themelor për rimëkëmbjen e PD-së.
Ata kërkojnë që me dorëheqjen e kryetarit, Kryesia e PD-së të mblidhet me urgjencë dhe të marrë masat e nevojshme, përfshirë anulimin e procedurës së nisur pa miratimin e Kryesisë së PD-së, ngritjen e një grupi gjithëpërfshirës pune për hartimin e rregullores për zgjedhjet dhe të kalendarit të procesit zgjedhor, si dhe shpalljen e një date të përshtatshme zgjedhjesh, siç mund të jetë java e tretë e muajit nëntor.
Ndërsa pas zgjedhjes së kryetarit të ri duhet të nisë organizimi i Kuvendit të jashtëzakonshëm, ku sipas grupimit duhet të paraqitet platforma për rimëkëmbjen e PD-së dhe për ringjalljen e opozitarizmit në Shqipëri.
Top Channel
