Ahmetaj: Rritja ekonomike s’lidhet me drogën

“Nuk ka vend që të ketë lulëzuar nga aktivitetet ilegale, pavërësisht nëse këto janë të mëdha apo të vogla. Zhvillimi ekonomik ka ardhur nga investimet e huaja, nga investimet vendase, nga rritja e punësimit, nga rritja e kërkesës së brendshme dhe nga besimi i aktorëve tek ekonomia shqiptare”, ka thënë Ahmetaj.

Për kreun e Financave, të njëjtat zhvillime të ligjshme shpjegojnë edhe forcimin e euros ndaj lekut. “Mos harroni që në 2016 kemi patur 1.5 miliard euro nga turizmi”, tha Ahmetaj.

Në 2016-n rritja ekonomike u përshpejtua në 3.5 për qind, ndërsa këtë vit qeveria pret që shifra të shkojë 3.8 për qind. Ahmetaj thotë se tani qeveria ka mundësi të ulë taksat, veçanërisht për rrogat e larta.

“Për shkak se ne e kemi kaluar krizën, për shkak se kemi një trajektore ulëse borxhi, për shkak se dhe në një vit elektoral po i konsolidojmë financat dhe nuk po i degjenerojmë ato, do të zbusim progresivitetin për ata që i kanë rrogat mbi 130 mijë lekë në muaj”, tha Ahmetaj.

Por rimëkëmbja e ekonomisë për ministrin e Financave ka një pengesë. “Prezenca e çadrës është risk real për ekonominë dhe mirëqënien e qytetarëve. Sot çadra është armiku kryesor i mirëqënies së qytetarëve”, shtoi Ahmetaj.

Top Channel