Dialogu, Basha: T’i lutemi Zotit

“Sot kemi shansin ta zgjidhim me dialog. Lulzim Basha në këtë dialog nuk përfaqëson veten e tij, as vetëm PD, as vetëm opozitën. Unë shkoj në këtë proces me vetëdijen e plotë se përfaqësoj interesat e një bashkimi të jashtëzakonshëm qytetar, më të madh popullor”, tha Basha.

Por ndërsa tha se është gati të gjejë gjuhën e kompromisit politik përmes dialogut, kreu i opozitës theksoi se nuk tërhiqet nga kërkesat e saj.

“Rrugë tjetër përveç zgjedhjeve të lira me qeveri teknike nuk ka. E kam shumë të thjeshtë të bëj kompromis, të gjej gjuhën e kompromisit politik për gjithçka që më takon mua dhe PD, po nuk bëj dhe nuk do të bëj asnjë tërheqje për gjithçka që i takon fateve të qytetarëve, të demokracisë shqiptare, të zgjedhjeve të lira e të ndershme. Zgjidhja që ne ofrojmë është zgjidhje e ndershme”, u shpreh lideri i opozitës.

Basha u shpreh i bindur se votim pa opozitën nuk do të ketë.

“Fundi nuk do të jetë votim pa opozitën, nuk do të jetë shpërndarje e popullit, fundi do të jetë fitorja e kauzës sonë të drejtë. Ndaj le të urojmë që sot arsyeja e shëndoshë të mbizotërojë dhe në mendjet e sëmura të pakicës që ka kapur peng popullin dhe do të marrë peng zgjedhjet. Ta urojmë, ta shpresojmë e t’i lutemi Zotit e për kundërshtarët tanë. Një gjë është e sigurt përmes dialogut ose përballjes populli do të fitojë gjithmonë”, tha Lulzim Basha.

Top Channel