Pashkë dhe politikë

Politikanët nuk i rezistuan dot tundimit të politikës në ditën e Pashkës, por sërish ata nuk gjetën dot paqe mes tyre. Edi Rama, i cili postoi 2 urime brenda pak orësh, zgjodhi një ikonostasë ortodokse të restauruar pas vitit 2013, për të uruar besimtarët e krishterë dhe për të treguar ndryshimin mes qeverisjes së tij dhe asaj të opozitës, Edi Rama thotë se është bërë shumë për trashëgiminë e thesaret historike e kulturore, mbetet shumë për të bërë, por që ka edhe shumë për të humbur, nëse, siç thotë ai, ndalemi sot në rrugën e Shqipërisë që duam, me shtet, punë dhe mirëqenie.

Ky mesazh i është dukur provokativ kreut të Partisë Demokratike, Lulzim Basha, i cili i quajti protestuesit demokratë misionarë të paqes dhe të shpresës. “Atij që edhe ditën e Pashkës i fryn tamtameve të luftës, i them se paqja po zbret në zemrën e çdo shqiptari. Se përmes paqes, bashkimit dhe vendosmërisë, e mira do të pushtojë të gjithë vendin tonë”.

Lulzim Basha i shmangu komentet politike kur ishte për urim në Katedralen Ortodokse në Tiranë, vendi ku kundërshtarët politikë nuk kursyen urimet për njëri-tjetrin.

Megjithatë, jo të gjithë iu shmangën komenteve. Fryma e dialogut mbizotëroi te dy anëtarë të koalicionit qeveritar.

“Dialogu, bashkëpunimi, janë themelet e një shprese për një të nesërme më të mirë. Shpresojmë që Pashkët të na ndihmojnë për këtë gjë”, tha kreu i LSI-së, Ilir Meta.

“Ne të politikës, në ditë si sot, duhet të jemi pak me turp. Kur shikojmë se si myslimanë e të krishterë përqafohen dhe urojnë njëri-tjetrin, nuk ka asnjë arsye që ne, mes shqiptarësh, të mos gjejmë gjuhën e përbashkët. Le t’i lëmë mënjanë inatet e vogla personale për të mirën e vendit”, tha kryebashkiaku i Tiranës, Erion Veliaj.

Nëse fryma e Pashkës do të ndikojë pozitivisht te dialogu, këtë do ta tregojë java e ardhshme, kur në Tiranë pritet të mbërrijë negociatori David McAllister.

Top Channel