Borchardt: Mos harroni të shkuarën

Duke hequr vija paralele mes Gjermanisë dhe Shqipërisë, ambasadori i OSBE-së në vendin tonë, tha se Gjermania e dokumenton të shkuarën përmes pllakatave, monumenteve e muzeve, ndërsa Shqipërisë i duhet të nxitojë në këtë drejtim.

“Në vendin tim, Gjermani, ne kemi shumë vende kujtese: pllaka, monumente, muze, ekspozita dhe qendra dokumentimi. Këto janë krijuar nga aktorë të ndryshëm, si edhe nga shteti dhe i dedikohen përkujtimit të viktimave të informimit të publikut për krimet dhe vuajtjet që ata kanë shkaktuar gjatë regjimit socialist e komunist. Shqipëria po përparon ngadalë në këtë aspekt. Unë besoj se ka vend për përmirësim në lidhje me përballjen me të shkuarën”, u shpreh ambasadori Bernd Borchardt.

Një traumë që ende nuk ka kaluar e quajti ministrja e Kulturës periudhën e diktaturës në Shqipëri, duke kërkuar kthimin në muze të historisë së diktaturës.

“Shkrimi i historisë nuk është detyrë e politikës, por është detyrë e politikës të ndërtojë mekanizma financiare dhe profesionale që dëshmitë e kohës të mos vdesin, që dëshmitarët të mund  të shprehen. Kjo është arsyeja pse vendosëm që Shtëpinë e Gjethit ta restaurojmë, të hulumtojmë gjithë historinë e krijimit të këtij instrumenti terrori të diktaturës komuniste, para se të jetë shumë vonë”, tha Kumbaro.

“Në Shqipëri të rinjve që nuk e kanë jetuar diktaturën u duhet dhënë me çdolloj doze vërtetësia e fakteve. Kampet e përqëndrimit japin infrasktrukturën e duhur dhe kjo nuk ka kosto. Nuk ka lidhje me financat. Mendoj se ka lidhje me atë që e sheh si spektakël, apo si operacion masiv për kurimin e plagës”, deklaroi  Bilal Kola, kryetar i Institutit të ish të Përndjekurve.

Ky ishte takimi i katërt i organizuar në kuadër të projektit “Mbështetja e platformës së dialogut kombëtar për shkeljen e të drejtave të njeriut gjatë ish-regjimit komunist në Shqipëri.”

Top Channel