Kreu i shtetit shqiptar shfrytëzoi viziten e tij në Baku të Azerbajxhanit për samitin e 5-të global, për t’i shprehur qëndrimet e Tiranës, Presidentit maqedonas Ivanov, se Shqiperia kërkon të ketë marrëdhenie të mira me të gjitha vendet e Ballkanit, përfshirë Maqedoninë.
Lidhur me situatën paszgjedhore në Shkup, Nishani ka shprehur shqetësimin për marrëdhëniet politike dhe ndëretnike atje, mbi të gjitha për zhvendosjen e krizës nga konteksti politik, në atë etnik.
Nishani i ka thënë Ivanovit në bisedën midis të dyve se Shqipëria nuk ka ndërhyrë dhe nuk ndërhyn në punët e brendshme të një shteti tjetër, për më tepër në atë të vendeve fqinje.
Qëndrimi i kreut të shtetit vjen pas refuzimit të asaj që Ivanov i bëri platformës shqiptare dhe që nuk pranoi të mandatonte Zoran Zaev, si Kryeministër.
Sipas njoftimit të Presidencës, Nishani i ka theksuar homologut të tij faktin se shqiptarët janë faktor shtetformues dhe se Shqipëria do t’i mbështesë në kërkesat e tyre legjitime për zbatimin e plotë të Marrëveshjes së Ohrit.
Më herët, referuar situatës në Maqedoni, Ivanov akuzoi faktorin ndërkombetar se i ka cënuar vendit të tij të drejtën e identitetit me ndërhyrjet në politikën e brendshme.
Maqedonia, tha Ivanov, është i vetmi shtet anëtar në OKB, që nuk gezon të drejtën të ketë identitetin e saj.
Top Channel
