Në çadrat pro peticionit të shoqërisë civile kanë firmosur deri tani ministrat socialistë dhe Kryeministri Rama. Kryebashkiaku Veliaj foli për objektivin e 1 milion firmave të qytetarëve, ndërsa ish-Kryeministri Majko i cilësoi ato si çadra të drejtësisë.
“Ata kërkojnë sipas tyre çadrën e lirisë, ne kemi çadrën e drejtësisë”, tha Majko.
“Peticionin e kemi firmosur dhe vulosur me votë në Kuvendin e Shqipërisë dhe nuk besoj se ne kemi nevojë të firmosim rrugëve nëpër çadra”, shprehet Gjovalin Kadeli.
Bashkëkryetari i koalicionit qeverisës Meta dhe ministrat e partisë së tij Gjosha, Dervishi, Panariti, Koka madje edhe deputetët e LSI-së u kanë qëndruar larg çadrave ku çdo ditë firmoset pro vettingut , pro reformës në drejtësi.
“Çështja e vettingut nuk është çështje peticionesh është çështje institucionesh dhe e zbatimit me korrektese dhe implementimit me shumë seriozitet”, thotë Luan Rama.
Madje në peticionin pro reformës nuk ka firmosur as Petrit Vasili, ministri i ri Drejtësisë i kabinetit Rama.
TCH: A keni firmosur për peticionin pro vettingut?
Petrit Vasili: Jo nuk kam firmosur.
TCH: Pse nuk keni firmosur?
Petrit Vasili: Nuk kam firmosur.
TCH: Partia LSI është pro vettingut?
Petrit Vasili: LSI është pro vettingut e ka firmosur vettingun. Në sajë të votave të LSI-së vettingu është sot një ligj që po zbatohet.
TCH: A mund të ngrihen komisionet e vettingut pa praninë e PD-së, e cila e ka bojkotuar Parlamentin?
Petrit Vasili: Duhet të konsultoni ligjin se çfarë thotë.
TCH: Ju i keni bërë ftesë që të rikthehen në Parlament?
Petrit Vasili: Patjetër që po.
Top Channel
