Kanë reaguar nga Zyrihu dy vëllezërit Orik dhe Laert Shyti pas vendimit të Gjykatës së Apelit, që çliroi nga akuzat grupin “Hakmarrja për Drejtësi”. Tonet e tyre kanë qenë të ashpra ndaj ish-kryeministrit Sali Berisha.
“Ndoshta kanë ndryshuar kohët dhe nuk besojmë se Sali Berisha do t’i shpallë edhe gjyqtarët që dhanë vendimin e sotëm anëtarë të “Hakmarrjes”. Natyrisht që nuk do ta pengojë vendimi i Gjykatës së Lartë, që shprehet se “Hakmarrja për Drejtësi” nuk ka ekzistuar kurrë, por është krijuar bashkë me platformën dhe apartamentin e mbushur me armë nga shërbëtorët e tij, nëpunës të shtetit. Kjo dhe Vettingu janë dy arsye që mund ta pengojnë t’i shpallë gjyqtarët anëtarë të “Hakmarrjes”, apo të kërcënuar e frikësuar nga “terroristët” e saj”, thuhet në reagimin e vëllezërve Shyti.
Por ndërkohë ka reaguar edhe ish-kryeministri Berisha, i cili e vlerëson vendimin e pafajësisë si të shpallur nga Edi Rama.
“Duke dënuar me ashpërsinë më të madhe këtë vepër kriminale të Edvin Kristaq Ramës, u bëj thirrje shqiptarëve të bashkohemi më shumë se kurrë dhe me revolucionin tonë demokratik, që nis më datë 18 shkurt të shpëtojmë veten, fëmijët tanë, shoqërinë dhe Shqipërinë nga sundimi i kryebanditit dhe bandave të tij!”, u shpreh Berisha në Facebook.
Por, tashmë të pafajshëm, vëllezërit Shyti thonë se nuk do t’ia falin Berishës atë që sipas tyre ai u ka bërë.
“Nëse nuk e ka kuptuar, atëherë po ia themi edhe një herë botërisht, se kurrë nuk ia falim krimin e shumëfishtë që ka kryer ndaj nesh dhe kurrë nuk ndalemi për të mbrojtur të vërtetën”, kanë thënë vëllezërit Shyti.
Për pafajësinë e së ashtuquajturës “Hakmarrje për Drejtësi” reagoi edhe kreu aktual i Partisë Demokratike, Lulzim Basha.
Top Channel
