Ndeshja e mesjavës e vlefshme për kampionatin italian “Serie A”, ajo mes Milanit dhe Lacios në “San Siro” ka nisur me një surprizë në formacionin e kryeqytetasve. Në portë, titullar në këtë takim ka zbritur Thomas Strakosha, portieri 21-vjeçar shqiptar, i cili pritet të ndjekë gjurmët e të atit Foto Strakosha.
Me Etrit Berishën të huazuar tek Atalanta vetëm ditën e fundit të merkatos verore nga ekipi lacial, drejtor sportiv i të cilit është Igli Tare, si dhe me dëmtimin në pulpë që e shqetëson portierin titullar italian, Federico Marchetti, trajneri i Lacios vendosi kështu t’ia besojë katërkëndëshin të riut shqiptar.
Strakosha ka luajtur vetëm 10 ndeshje në Serie B me ekipin e Salernitanës, por duke qenë se presidenti i Lacios, Claudio Lotito zotëron edhe shumicën e aksioneve të ekipit salern, shumë prej të rinjve i kalon në këtë ekip për të fituar eksperiencë, ndërsa për Strakoshën duket se erdhi radha për të shfaqur veten në një provë jo të lehtë në “San Siro”, përballë kuqezinjve të Milanit të drejtuar nga Montella.
Top Channel
