Shpërthen raketa e “riciklueshme”

“SpaceX” njoftoi se “një anomali” kishte ndodhur në momentin kur raketa po furnizohej me karburant. Megjithatë, asnjë person nuk është plagosur. Edhe ngarkesa e raketës, një satelit komunikimi i ndërtuar nga izraelitët për kompaninë Facebook, që pritej të lëshohej të shtunën, u shkatërrua bashkë me të.

“Facebook”, në partneritet me “Eutelsat Communications”, kishte planifikuar të përdorte satelitin “Amos-6” në mënyrë që të ofronte mbulim interneti “broadband” (kabllor) në pjesë të konsiderueshme të Afrikës nënsahariane, si pjesë e nismës “internet.org”.

Themeluesi i “Facebook”, Mark Zuckerberg, i cili po viziton aktualisht Afrikës, tha se ishte “thellësisht i zhgënjyer” teksa dëgjoi lajmin e shkatërrimit të satelitit.

“Ne mbetemi ende të angazhuar ndaj misionit tonë për të lidhur cilindo në botë, e do të vazhdojmë të punojmë derisa kushdo të ketë mundësinë për t’u lidhur në internet, gjë që do ta ofronte edhe ky satelit”, shkroi ai në llogarinë e tij në rrjetin social.

Një zyrtar i lartë izraelit i hapësirës tha se humbja e satelitit “Amos-6”, e vlerësuar në më shumë se 200 milionë dollarë dhe që zotërohej nga “Spacecom”, përbënte një goditje të rëndë për industrinë.

“Për sa kohë që industria e komunikimeve satelitore izraelite është e shqetësuar, kjo do të thotë se përbën një goditje tepër të madhe, saqë mund të vendosë në pikëpyetje të ardhmen e kësaj industrie, nëse nuk del nga kjo baltë”, tha kreu i Agjencisë Hapësinore Izraelite, Isaac Ben-Israel.

Stacioni i Forcave Ajrore “Cape Canaveral” tha se një shpërthim i fuqishëm kishte ndodhur rreth orës 16:00 në kompleksin 40 të lëshimit të raketave, i cili i ishte dhënë me qira “SpaceX”. Kjo e fundit, përmes një deklarate tha se “anomalia e kishte origjinën në pjesën e sipërme të tankeve me oksigjen, dhe se ndodhi gjatë mbushjes së pajisjes me karburant”.

Sa i përket mospasjes së viktimave, më tej thuhet se “i gjithë personeli ishte larguar nga vendi i lëshimit si shkak i procedurave standarde të operimit në të tilla raste”.

“SpaceX” synon të krijojë një epokë të re të raketave të riciklueshme dhe të përshtatshme për udhëtime hapësinore private, ndërsa e ka përdorur edhe më herët raketën “Falcon-9” për të dërguar ngarkesa në Stacionin Ndërkombëtar të Hapësirës (ISS). “SpaceX” drejtohet nga Elon Musk dhe selinë e ka në Hawthorne pranë Los Angelesit, një shef ekzekutiv i cili drejton edhe kompaninë e makinave elektrike “Tesla” dhe që e ka krijuar pasurinë e tij përmes kompanive të internetit.

Top Channel