PS e Dibrës: Kallëzimi i PD, alibi për humbjen

“E përfshirë në ethet e humbjes së pritshme në zgjedhjet e pjesshme të 11 Shtatorit për kreun e Bashkisë së Dibrës, Partia Demokratike është angazhuar intensivisht në një skemë për të krijuar alibinë justifikuese të disfatës elektorale”, thuhet në reagimin e socialistëve.

Sipas socialistëve, veç alibisë për humbjen, kallëzimi i opozitës synon edhe të baltosë procesin zgjedhor.

Në reagim thuhet më tej se “shtabi elektoral i kandidatit të koalicionit Aleanca për Shqipërinë Europiane hedh poshtë me neveri përmbajtjen e këtij kallëzimi penal duke e cilësuar krejtësisht të pavërtetë dhe me synime të paracaktuara politike”.

“Kjo përpjekje e Partisë Demokratike për të baltosur zgjedhjet vjen në një kohë kur deputetët, aleatët dhe ish-zyrtarët e saj kanë zbarkuar në Bashkinë Dibër, në përpjekjen për të intimiduar zgjedhësit dhe tjetërsuar vullnetin e tyre të lirë. Në realitet, ata po fyejnë popullin e Dibrës duke vulosur humbjen e tyre të sigurtë në zgjedhjet e 11 shtatorit”, shtohet më tej në reagim.

Socialistët dibranë jo vetëm që hedhin poshtë pretendimet e Partisë Demokratike, por deklarojnë se e kundërta është e vërtetë.

“Qytetarët e Dibrës, prej dy javësh kanë patur rastin të ndeshen me kërcënimet e ushtruara ndaj tyre në mënyrë të vazhdueshme. Në krye të kërcënimeve është vënë edhe vet kreu i opozitës Lulzim Basha i cili përveç aktivizimit në terren nuk ka ngurruar të kërcënojë punonjësit e administratës publike përmes telefonatave e mesazheve”, thonë ata.

Sipas Partisë Socialiste opozita ka përfshirë në kërcënime ndaj votuesve dibranë kryebashkiakun e Kamzës, Xhelal Mziu.

“Në këtë skemë është përfshirë fuqishëm edhe kryetari në detyrë i Bashkisë së Kamzës Xhelal Mziu, person me precedent penal dhe i njohur për përdorimin e administratës në funksion të fushatave elektorale të Partisë demokratike. Ai është angazhuar intensivisht në Zall Dardhë, Reç dhe Lurë. Ekzistojnë dëshmi të qytetarëve të kërcënuar prej tij me prishjen e shtëpive të familjarëve që jetojnë në Kamzë ashtu sikurse përpjekjet për tu tjetërsuar vullnetin politik”, thonë socialistët.

Në reagimin e shtabit të kandidati Muharem Rama shtohet se të njëjtin angazhim në terren duke ushtruar presion ndaj zgjedhësve.

“Kryetari i Grupit Parlamentar të PD-së, Edi Paloka, Sekretari i Përgjithshëm Arben Ristani, ish-zv.ministri i Brendshëm Genti Strazimiri, ish-ministri i Drejtësisë Aldo Bumçi, ish-ministri i Arsimit Myqerem Tafaj dhe Luçiano Boçi. Ish-ministri i Brendshem Flamur Noka po ushtron presion në Maqellarë ndërsa ish-ministri i Ekonomisë Florion Mima në Sllovë. Gjithashtu, ish-ministri i Bujqësisë Jemin Gjana është duke ushtruar presion të drejtpërdrejtë mbi zgjedhësit e njësisë së Kaladë së Dodës dhe ish-ministri i Mbrojtjes Arben Imami në Lurë. Këtij angazhimi kriminal nuk i kanë shpëtuar as figura të tjera problematike në të shkuarën e tyre si ish-drejtori i Përgjithshëm i Doganave Flamur Gjymyshka e ish-Shefi i Shtabit të Përgjithshëm të Ushtrisë, Xhemal Gjunkshi”, thonë socialistët.

Reagimi shton se pavarësisht gjithë këtij angazhimi, “opozita teksa e sheh çdo ditë se manovrat për tjetërsimin e votës nuk po i funksionojnë dhe kanë dështuar, ka zgjedhur planin B për baltosjen e procesit zgjedhor”.

Në fund të deklaratës, Shtabi i kandidati të Aleancës për Shqipërinë Europiane kërkon prej organit të akuzës që të hetojë sa më parë të gjitha rastet dhe i bën thirrje Partisë Demokratike që “të braktisë skenarin e krijimit të alibisë së humbjes.

Top Channel