Hakerat ndërpresin regjistrimin e popullsisë në Australi

Vetëm pak orë më parë, zyra Australiane e Statistikave ishte mburrur se pavarësisht fluksit të madh që pritej, faqja nuk do të bllokohej. Por mesa duket, zyrtarët australianë nuk kishin llogaritur sulmet kibernetike.

Çdo australiani i kërkohet një herë në 5 vjet që të plotësojë disa formularë në mënyrë që autoritetet të kenë një panoramë sa më të qartë të vendit. Pritej që këtë vit, 2 të tretat e popullisë ta bënin këtë në internet, në faqen e ndërtuar për këtë qëllim dhe që prej kohësh reklamohej nga qeveria.

Por bllokimi i faqes ka sjellë një lumë kritikash ndaj ekzekutivit në përgjithësi dhe ndaj Zyrës së Statistikave në veçanti. Shumë politikanë australianë dhe shumë qytetarë kanë kërkuar dorëheqjen e krerëve të këtij institucioni për paaftësinë e treguar. Sipas tyre, Zyra e Statistikave kishte 5 vjet kohë për t’u përgatitur dhe sërish ia doli që të dështojë.

Pas bllokimit të faqes së internetit, kryeministri australian nxitoi që të siguronte popullsinë se të dhënat personale nuk janë kompromentuar. Kreu i qeverisë, Malcolm Turnbull tha se hakerat nuk kanë mundur që të hyjnë në të dhënat e Zyrës së Statistikave, por thjesht bllokuan faqen e saj.

Kryeministri pranoi se disa nga masat e sigurisë dështuan, por siguroi se të dhënat e publikut janë të sigurta. Sidoqoftë, incidenti ngriti shqetësime se të dhënat e qytetarëve janë prekur dhe shumë njerëz kërkuan një hetim transparent të incidentit.

Top Channel