Guvernatori i Bankës së Shqipërisë, Gent Sejko deklaroi se ekonomia ka shënuar në gjysmën e parë të vitit një ecuri më të mirë nga pritshmëritë fillestare.
“Rritja ekonomike në tremujorin e parë ka rezultuar në kahun e sipërm të pritshmërive tona. Treguesit e tërthortë sugjerojnë se ritmet e rritjes ekonomike kanë qenë në nivele të përafërta edhe në tremujorin e dytë të vitit”, thotë Gent Sejko.
Guvernatori tha se zgjerimi i prodhimit kombëtar është mbështetur nga rritja e konsumit dhe investimeve private.
“Rritja e tyre pasqyron përmirësimin e bilanceve financiare të bizneseve dhe familjeve, zhvillimet pozitive në tregun e punës, zbutjen e pasigurisë dhe zhbllokimin e tregut të ndërtimit”, u shpreh ai.
Për shkak të këtyre zhvillimeve, Guvernatori tha se Këshilli Mbikëqyrës e ka ndryshuar vlerësimin për rritjen ekonomike.
“Ne kemi rishikuar lehtësisht për lartë shifrën e rritjes ekonomike për këtë vit”, u shpreh Sejko.
Por, sipas Guvernatorit, rimëkëmbja e ekonomisë do të varet nga gjallërimi i aktivitetit kreditues.
“Ecuria e kredisë shfaqi tendenca përmirësimi në tremujorin e dytë. Megjithatë, rritja e saj mbetet e zbehtë në raport me pritshmëritë tona. Ne gjykojmë se nxitja kërkesës dhe përmirësimi i ofertës për kredi mbetet një nga parakushtet për rritjen ekonomike afatmesme dhe afatgjatë të vendit”, vlerëson BSH.
Kreu i bankës përshëndeti dhe miratimin e reformës në drejtësi, e cila sipas tij forcon besimin në ekonominë shqiptare.
Top Channel
