Pacientët të cilët kanë nevojë për gjak, si në raste plagosjeje, aksidenti, operacioni apo fëmijët talasemikë, tanimë do të marrin gjak më të sigurtë.
Analiza e gjakut që dhurohet do të jetë më e shpejtë në kohë dhe me i sigurtë në cilësi falë një pajisjeje të instaluar pranë Qendrës së Gjakut.
“Sot celebrojmë nisjen e kësaj teknike për të zbuluar në kohë të shkurtër mundësinë e një infeksioni që rezultojnë që janë të pranishme tek qytetarët dhe pacientët. Kjo teknologji na mundëson që të kemi vijimësi në ofrimin e kësaj analize”, tha ministri i Shëndetësisë, Ilir Beqaj.
Më parë, për të zbuluar nëse gjaku i dhuruar është i infektuar me virusin HIV pritej 6 muaj, tanimë do të jetë gati për 4 -5 ditë.
“Me këtë aparat shtojmë edhe një shkallë tjetër sigurie për gjakun duke eleminuar mundësinë e infektimit të personave. Për hepatitin C, periudha e analizave shkurtohet në 2.5 ditë dhe për HIV 5 ditë”, thotë mjekja mikrobiologe, Rinalda Skendaj.
14 qershori është dhe dita ndërkombëtare e dhurimit gjakut, duke u ofruar personalisht ministri i Shëndetësisë u bëri thirje qytetarëve të dhurojnë gjak për të shpëtuar një jetë dhe për t’u ardhur në ndihmë fëmijëve talasemikë të cilët e kanë nevojë të vazhdueshme.
Top Channel
