Në një komunikatë për mediat gjatë mesditës së të mërkurës, deputeti demokrat Arben Ristani ka publikuar ato që nga selia blu i quajnë si fakte tronditëse për rolin e ministrit të Brendshëm, Saimir Tahiri, por edhe funksionarëve të emëruar prej tij, në kultivimin dhe trafikun ndërkombëtar të drogës.
Denoncimi i radhës vjen pas publikimit në mediet greke për shpalljen në kërkim të të ashtuquajturit baron i drogës, një trafikant me inicialet K.B. që kishte lidhje me qeverinë dhe drejtonte zyrën e Transportit në qytetin e Sarandës.
Inicialet janë bërë tashmë publike edhe nga Ristani, i cili tha se Klemend Balili konsiderohet tashmë jo vetëm prej opozitës, por edhe prej autoriteteve greke dhe shërbimeve të partnerëve ndërkombëtarë si koka e një organizate kriminale të narkotrafikut, madje deri atje sa të cilësohet edhe si “Escobari i Ballkanit”.
Opozita, siç u shpreh Ristani, e ka denoncuar që më 18 maj të 2014-s, kohë kur Rama e emëroi Klemend Balilin si drejtor të Transportit në qytetin e Sarandës. Balili, sipas PD-së është arrestuar në korrik të vitit 2006 me 750 kg kanabis.
Por Ristani ka shtuar më tej se Balili njihet edhe për lidhjet e forta politike, duke qenë sponsorizues i fushatës elektorale të PS-së në vitin 2013. E për këto lidhje të drejtpërdrejta, ai tha se rezultojnë të përfshirë kushërinjtë e ministrit Tahiri, Habilajt, nëpërmjet të cilëve ai ka pasur edhe lidhje me vet ministrin.
Por lidhjeve të drejtpërdrejta me të kërkuarin e autoriteteve greke nuk u kanë shpëtuar as disa drejtues të lartë të Policisë së Shtetit, gjithnjë sipas selisë blu, që ka përmendur emrat e Albert Pata, ish-drejtor i forcave të posaçme operacionale; Perlat Çullhaj, drejtor i Policisë së Durrësit; Jaert Çelaj, drejtor i Policisë së Vlorës; Aranit Arapi, drejtor i Policisë së Gjirokastrës; por edhe me ish-drejtorin e kufirit në Vlorë, Kastriot Skënderi, i cili u kap në 2015-n në zonën e Kakomesë me një kamion me 1 ton kanabis sativa.
Top Channel
