Presidenti amerikan, Barack Obama ka nominuar gjykatësin veteran të Gjykatës së Apelit, Merrick Garland, për t’u bërë pjesëtar i Gjykatës Supreme të Drejtësisë amerikane.
Këtë gjë e bëri të ditur vet kreu i Shtëpisë së Bardhë gjatë një konference për shtyp gjatë mesditës së të mërkurës me orën lokale.
Vendi vakant në këtë gjykatë u krijua pas vdekjes së gjykatësit Antonin Scalia muajin e kaluar, në moshën 79-vjeçare.
Gjykatësi Garland, 63 vjeç, është aktualisht kreu i Gjykatës së Apelit të Uashingtonit, si dhe një ish-prokuror.
Megjithatë, shumica republikane e Senatit ka bërë të ditur se do të bllokojë çdo votim të kandidaturës për Gjykatën Supreme, për sa kohë që ajo vjen nga Presidenti Obama.
Vdekja e Scalias gjatë muajit të kaluar, një konservator i hekurt, la gjykatën 9-anëtarëshe të ndarë në mënyrë të barabartë mes konservatorëve (republikanë) dhe liberalëve (demokratë). Ndarja nga jeta nxit gjithashtu edhe një betejë në një vit elektoral mbi pasuesin e tij, kur dihet që në nëntor SHBA-të do të zgjedhin Presidentin e ri.
Merrick Garland u emërua nga Presidenti demokrat, Bill Clinton në vitin 1997, duke fituar konfirmimin përmes një votimi 76-23, si dhe ka shërbyer në Departamentin e Drejtësisë gjatë administratës “Clinton”, përpara këtij posti.
Një zyrtar i Shtëpisë së Bardhë, i cituar nga agjencia e lajmeve “Reuters”, tha se “askush nuk është më i përshtatshëm sesa ai, për të shërbyer në Gjykatën Supreme”.
Top Channel
