Kuvend, Dule: Politika, e kriminalizuar; Rama: Kriminalizim është përbaltja

“Ka elementë të inrkiminuar dhe ju që i futët këtu midis nesh mbani përgjegjësinë kryesore”, ka thënë Dule duke iu drejtuar Ramës.

“Zoti Braçe, mos bëni si kone”, i ka thënë më pas deputetit socialist.

Më tej, Dule ka komentuar edhe qëndrimin e lidershipit të PS ndaj deputetit Ben Blushi. Dule ka akuzuar gjithashtu koalicionin qeverisës se ka shkelur parimet me të cilat përfaqësohej kur ishte në opozitë.

“Një qeveri që erdhi në pushtet me zgjedhje të lira, por dështoi të bënte zgjedhje të lira. Një opozitë që erdhi në pushtet me sloganin e fjalës së lirë, sot po linçon ndaj një politikani. Ju nuk mund të pengoni një politikan të gjykojë ecurinë politike në një vend. Zotërinj deputetë, mos u verboni nga interesat e momentit. Vendi ka nevojë për reforma, jo uzurpime apo alibi”, ka thënë Dule.

Duke iu përgjigjur akuzave, kryeministri Edi Rama iu drejtua ish-aleatit të tij duke thënë: “Po të kishte kriminelë këtu, këtu do të isha ose unë, ose ai. Të thuash këtu mos bëj si kone, mund të të thuash edhe ty mos bëj konen e Greqisë”.

Rama: Kriminalizim është përbaltja me fakte të fabrikuara

Në vijim të përgjigjes së tij, kryeministri Edi Rama iu drejtua ish-aleatit të tij duke thënë: “Ti je një mik i mirë dhe përgjithësisht i vëmendshëm. Nuk e kuptova pse ishte i pavëmendshëm ndaj fajlës time ditën që ktheu përmbys atë që unë thash”.

“Unë nuk thash jemi të gjithë bashkëfajtorë, nuk thash jemi të gjithë kriminelë. Dhe unë i pari e thash se jemi kriminelë të trajtuar si të tillë për vite e vite të tëra”, ka thënë Rama.

Ai ka thënë se, “akuzat mbi mua, kryetarin e Kuvendit dhe gjithë që janë këtu janë tregues ulëritës i faktit se problem madhor nuk është dekriminalizimi, por kriminalizimi i kundërshtarit me çdo mjet, çdo kusht e çdo çmim”.

“Kriminalizimi i çdo ideje, i çdo përpjekjeje, i çdo pune. Ky është problemi i madh i yni. Kriminalizimi përmes faktesh të fabrikuara, që shiten si liri, kundërshti apo demokraci”, ka vijuar Rama.

“Ti je i vjetër këtu, je dëshmitar i vjetër i këtij Kuvendi. Ja ku janë ata që dalin të përbaltur në dinjitetin e tyre, në fëmijët e tyre, fisin dhe gjithçka që kanë më të shtrenjtë, njësoj si në kohën e vjetër. Vetëm me një ndryshim, atëherë përfundoje me plumb, ndërsa sot përfundon me baltë”, ka deklaruar Rama.

“Ne bëmë mirë që vendosëm një vijë të kuqe për gjithë ata që marrin një funksion publik apo që hyjnë në shërbimin publik. Dhe ishim unë dhe kryetari i Kuvendit që e propozuam, jo vetëm për ata që zgjidhen, por edhe ata që janë në administratë. E kam përdorur me neveri fjalën dekriminalizim, Shqipëria nuk është xhungël e Brazilit, ky është një parlament ku njerëzit kanë ardhur me anë të suksesit. Nuk të bën kriminel fakti që flet Saliu”, ka shtuar ai, duke i thënë ish-aleatit se, këtë që po bën e ka nga humbja.

Mes tyre kanë vijuar replikat.

Dule: Zgjedhje nuk kam humbur, por nuk mund të fitoj kur kam përballë këtë mekanizëm qeveritar.

Rama: Të ftoj të bëhesh pjesë e PS. Eja në PS që të na përmirësosh.

Dule: Nuk do të pranoja kurrë të isha pjesë e PS-së që ka katandisur Rama. Jam i destinuar të humbas çdo proces zgjedhor ku përballë kam hajdutrinë.

Top Channel