Masakra e Elbasanit, gjendet një tjetër automatik; 46 të shoqëruar

Policia ka vijuar gjatë gjithë natës punën për kapjen e autorëve të vrasjes së 3-fishtë që ndodhi mbrëmjen e kaluar në Elbasan. RENEA dhe FNSH kanë ushtruar kontroll në dhjetëra banesa në Elbasan, Peqin, Cërrik, Gramsh dhe Librazhd dhe ka shoqëruar në komisariat 46 persona për verifikim.

Janë kontrolluar gjithashtu mjete me të cilat dyshoheshin se mund të lëviznin autorët dhe janë kontrolluar mbi 150 garazhe makinash në hyrje pallatesh. Policia ka gjetur në vendin e ngjarjes dy armë automatike kallashnikov dhe 65 gëzhoja.

Policia ka shtënë në dorë edhe pamjet filmike të kamerave të sigurisë të vetë lokalit ku ndodhi masakra. Nuk dihet ende se çfarë përmbajnë këto pamje, por policia ka sekuestruar të gjitha aparaturat.

Pronarët kishin vendosur kamera sigurie në lokalin e vogël që frekuentohej nga anëtarët e familjes Çapja dhe miqtë e tyre të ngushtë. Kjo është arsyeja pse viktimat dhe të plagosurit rezultojnë me lidhje familjare, por edhe shoqërore të ngushta.

Persona ende të paidentifikuar hapën zjarr në drejtim të një lokali në afërsi të stadiumit “Elbasan Arena”, duke lënë 3 persona të vdekur dhe 10 të plagosur.

Nga të dhënat e para dyshohet se zjarri u hap me një arme tip kallashnikov nga një automjet tip “BMW X5” në drejtim të lokalit. Si pasojë e plumbave, kanë humbur jetën Agron Çapja, Ardit Sinakoli dhe Eno Bedalli.

Ndërkaq, të plagosur mbetën: Arnold Çapja, Florenc Çapja, Fejzulla Çapja, Bujar Reshka, Luan Muça, Ferit Muça, Erdis Sulku dhe Ardian Zharri.

Paraprakisht dyshohet se krimi ka ndodhur për hakmarrje lidhur me ngjarje të së shkuarës, pasi familja Çapja nuk është e panjohur për Policinë e Shtetit.

Rreth 1 orë pas ngjarjes, 6 nga të plagosurit u transportuan me helikopter nga Elbasani drejt Spitalit të Traumës në Tiranë, pasi gjendja e tyre ishte e rënduar. Por, sipas drejtorit të këtij spitali, Gjovalin Bushi, më e rënduar paraqitet gjendja e 3 prej tyre.

Top Channel