Drejtësia, Manjani: Drafti, jo i shumicës

Hamendësimit se pas propozimeve kushtetuese që propozoi Ministria e Drejtësisë qëndron LSI-ja, Ylli Manjani i është përgjigjur se draftet nuk janë qëndrime politike, por janë produkte të punës së ekspertëve: “Është draft ekspertësh, të dyja draftet janë ekspertësh. Nuk janë propozime politike, por propozime ekspertësh, se po të ishin të mazhorancës, nuk do të quheshin ekspertë ata”.
 
Duke e mohuar disa herë ekzistencën e qëndrimeve të ndryshme brenda mazhorancës për reformën në drejtësi, Ylli Manjani tha se tashmë është koha që ekspertët të përballin draftet në komisionin e posaçëm të reformës, ku tha se edhe opozita mund ta ketë një të tillë: “Tani është momenti i procesit politik. Politika duhet të shqyrtojë të gjitha alternativat, që të kemi më të mirën”.  

Diskutimi në nivel politik i draftit të reformës në drejtësi është një qëndrim i mbështetur hershëm nga LSI-ja. Pas përfundimit të draftit të ekspertëve të nivelit të lartë dhe atij të Ministrisë së Drejtësisë, nuk ka asnjë pengesë për mbledhjen e komisionit të posaçëm të reformës në drejtësi.

Ai ishte menduar të mblidhej gjatë kësaj të marte, megjithatë nuk pati asnjë shpjegim se përse nuk u mblodh ky komision, sikundër pritet të sqarohet se kur struktura e posaçme parlamentare e reformës do të nisë punë për shqyrtimin e drafteve të ekspertëve. Në rast të mbledhjes së tij, të pranishëm pritet të jenë vetëm përfaqësuesit e mazhorancës, pas largimit të opozitës dhe deklarimit të saj se nuk do të depozitojnë asnjë draft të tyre.

Nga Lezha ministri i Drejtësisë përshëndeti edhe investigimin e “Fiks Fare” për ciklin e emisioneve denoncuese për korrupsionin në gjykata: “Kanë mbështetjen time të gjithë prokurorët për të mos kursyer penën dhe prangat për këdo që bën zullume në zyrën e shtetit. Kushdo që abuzon, duhet të marrë përgjegjësi. Unë e falenderoj “Fiks Fare”-n sepse na ndihmon për të kuptuar situatën dhe për të luftuar korrupsionin”.

Top Channel