Basha: PS po shmang Venecian

Lulzim Basha tha se pavarësisht deklaratave të bëra në publik se nuk ka asnjë draft, maxhoranca e ka hedhur atë në tryezë më 29 dhjetor dhe sipas tij nuk reflekton rekomandimet e Venecias.

“Kam bërë një ftesë publike për Ramën dhe Metën që të punojmë mbi rekomandimet e Venecias si udhërrëfyes. Deri më tani ka patur vetëm retorikë dhe asnjë veprim në këtë drejtim. Përkundrazi, ka patur veprime që bien ndesh me rekomandimet e Venecias dhe zotimin publik të maxhorancës, siç ishte drafti parafabrikat i 29 dhjetorit, një përpjekje tinëzare e Edi Ramës”, tha Basha.

Kreu i demokratëve kërkoi një përgjigjie të qartë nga kryeministri Rama sa u përket rekomandimeve.

“Më 4 janar tryeza ra dakort dhe tha që nuk ka draft tjetër, por sërish maxhoranca ka shpërndarë një draft ku nuk reflektohen rekomandimet e Venecias. Në këto kushte Rama duhet të përgjigjet; t’i japë “Po” ose “Jo” Venecias. Ai mund të jetë draft i PS, i Fatmir Xhafës, por nuk është një produkt konsensual”, deklaroi kreu i PD.

Basha theksoi se Partia Demokratike nuk do të pranojë asnjë draft që nuk pasqyron rekomandimet e Venecias, ndërsa lidhur me deklaratën e Presidentit të Republikës, dhënë një ditë më parë, u shpreh i gatshëm për të mbështetur çdo nismë të kreut të shtetit në këtë drejtim.

“Mirëpres cdo nismë të presidentit për të ndihmuar në transparencën e procesit për të parë qartë se kush ka vullnet dhe kush jo. PD ka vullnet të çeliktë për reformën në drejtësi, ashtu siç ka vullnet të çeliktë edhe për moskapjen e drejtësisë”, tha ai.

Top Channel