Basha: Qeveri teknike dhe zgjedhje

“1.2 miliardë euro, para që përndryshe do të ktheheshin në pensione më të larta, rroga më të larta, në bursa studimi, në mundësi për një shëndetësi më të mirë e më përgjegjëse për qytetarët shqiptarë, në punësim, në mirëqenie, në ndihmë ekonomike, por që sot e gjithë ditën janë kthyer në pasuri përrallore për këta sheikë korrupsioni, për dyshen Rama-Meta dhe 40 hajdutët e tyre. Faktet njihen botërisht e pas dy vite përballje, e denoncime nuk ka shqiptarë që nuk e di se Republika e Shqipërisë sot nuk ka më një qeveri legjitime kushtetuese por një bandë hajdutësh që duhen larguar një orë e më parë”, iu drejtua të të rinjve fierakë, Lulzim Basha.

Pak ditë përpara protestës së 8 Dhjetorit, Lulzim Basha i bëri Edi Ramës akuzën më të rëndë të këtyre dy viteve dhe e krahasoi për ngjashmërinë diktatoriale me Enver Hoxhën.

“Kjo është jo vetëm një hajdutëri por kjo është një pacipësi, një tallje me popullin që vetëm dikush e ka bërë para tij dhe siç raportonte sot media më prestigjioze në botë, BBC shqiptarët kanë ngritur gishtin dhe fajësojnë Edi Ramën njësoj siç fajësonin Enver Hoxhën. Dhe ky nuk po i lë gjë mangut me kërbaçin e ngritur dhe trajtimin e sipërmarrjes si armike. Nuk po i lë gjë mangut me përbuzjen dhe rishpronësimin e pronarëve. Nuk po i lë gjë mangut me shkeljen dhe burgosjen e të përndjekurve. Nuk po i lë gjë mangut me censurën, me poshtërimin, me mashtrimin ndaj rinisë studentore, me një palo ligj që do ta hedhim një orë e më parë në koshin e mbeturinave. Nuk po i lë gjë mangut në adhurimin e xhelatëve të diktaturës, e ka marrë edhe ky rrugën e Enverit. Me 8 dhjetor t’i japim shtysën e fundit”, u shpreh shefi i opozitës.

Në Fier, por edhe më herët paradite në Tiranë gjatë mbledhjes së Grupit Parlamentar, Lulzim Basha thotë se zgjidhja është largimi i qeverisë “Rama” nëpërmjet protestave. Deri tani nuk ka asnjë detaj publik sesi do të organizohet protesta e 8 Dhjetori dhe sa do të zgjasë ajo, por kreu i opozitës shpjegoi se çfarë do të thotë “zgjidhje‎”.

“Zgjidhja është krijimi i një qeverie teknike, që do të përgatisë reformën zgjedhore, do të implementojë ligjin e dekriminalizimit dhe do të përgatisë vendin për zgjedhje të reja. Nuk duam thjesht të largohen këta e të vijmë ne. Duam një zgjidhje për Shqipërinë në mes të së keqes që e ka mbërthyer. Se kush do të vijë, le ta vendosë populli me votë”, deklaroi Basha.

Top Channel