Gjashtë persona të tjerë kanë ndërruar jetë për shkak të plagëve të marra në zjarrin që përfshiu klubin e natës në Rumani, duke e çuar në 38 numrin e viktimave.
Katër persona mësohet se u ndanë nga jeta në spitalin e Bukureshtit, ndërsa dy të tjerë në Holandë, ku po mjekoheshin. Ndërkohë, mbi 100 persona të tjerë vazhdojnë të marrin mjekime, 48 prej të cilëve në gjendje kritike.
Zjarri në klubin e natës, më 30 tetor, u shkaktua nga fishekzjarret. Ngjarja çoi në protesta të shumta dhe në dorëheqjen e kryeministrit Victor Ponta.
Ndërkohë, pasojat po i vuan edhe Cristian Popescu, ish-kryetar i njësisë numër 4 të kryeqytetit rumun ku ndodhej klubi, pasi kishte dhënë liçencë edhe pse menaxherët nuk kishin marrë dirtën jeshile nga zjarrfikësit.
Në pranga kanë përfunduar edhe tre pronarë të klubit, nën akuzën e neglizhencës për shkak të mbipopullimit të ambjentit, në një kohë kur mungonin daljet e emergjencës.
Zërat se siguria në ambjentet e klubit ishte kompromentuar për shkak të korrupsionit, një problem që gërryen prej kohësh Rumaninë, kanë irrituar më shumë qytetarët ndaj elitës politike.
Mijëra protestues mbajtën një tubim mbrëmjen e së premtes në Bukuresht, për të katërtën ditë rresht. Presidenti Klaus Iohannis bëri thirrje për një “erë ndryshimesh” në klasën politike rumune, pas dorëheqjes së kryeministrit Ponta.
Top Channel
