Platforma e opozitës për ekonominë, Basha: Lehtësi biznesit

Dhe megjithëse propozimet nuk janë ende përfundimtare, në platformën e opozitës gjenden 5 pika kyçe, të cilat do të jenë shtylla për programin ekonomik të Partisë Demokratike. Për të nxitur biznesin të formalizohet opozita propozon rritjen e nivelit të xhiros për biznesin e vogël dhe rregullimin me ligj të sjelljes së tatimorëve.

“Po shqyrtojmë këtë propozim.Ta çojmë nivelin e biznesit të vogël në 120 milionë lekë të vjetra. E dyta, biznesi i vogël do të paguaj një herë, vetëm një herë do të vendosë pullën në dritare siç e kemi pasur me automjetet dhe tatimorët. Nuk kanë më punë të shkojnë dhe të bëjnë terror te bizneset”, tha Basha.

Biznesi fason i ka shfaqur kreut të opozitës shqetësimin për taksën e pronës, për të cilën Partia Demokratike propozon përgjysmimin e tarifave, siç ka qënë gjatë qeverisjes demokratike. Lulzim Basha beson se kjo masë lehtësuese nxit punësimin.

“Taksa e pronës do të rikthehet në nivelet që ka qenë dhe të mblidhet sepse këtu nuk mblidhet. Qëllim më të madh se punësimi i njerëzve qeveria nuk duhet të ketë dhe ju siguroj se qëllim më të madh qeveria ime kur të më jepni besimin nuk do të ketë. Ulja e taksave do të jetë në këtë funksion”, u shpreh Basha.
 
Ulja e çmimit të energjisë është një nga shtyllat e platformës ekonomike të Partise Demokratike. Sesa do të ulet çmimi, kjo nuk është vendosur ende, por, duke prekur në mënyrë drastike TVSH-në, Lulzim Basha synon të arrijë një çmim konkurues në rajon.

 “Për çmimin e energjisë po studiohet ulja e TVSH-së. Do bëjmë simuli me uljen 15% dhe deri me 19% uljen e TVSH-së e energjisë për konsumatorin dhe për industrinë. Të tjera propozime mund ti diskutojmë dhe të vijmë me zgjidhje të tjera”, tha kreu i PD-së.

I njëjti arsyetim u bë nga kreu i opozitës edhe për propozimin e hershëm të Partisë Demokratike për të kthyer në nivelin e dikurshëm taksën e qarkullimit, duke ndikuar në uljen e çmimit të karburanteve.

“Taksa shtesë e qarkullimit do të jetë e para që do të ikë 240 lekë për litër, nuk është pak”, tha ai.

Propozimet e Partisë Demokratike janë përllogaritur në bazë të një sistemi fiskal me taksë të sheshtë 9 përqind.

Top Channel