Austri, 20 mijë njerëz në shesh në tubimin proemigrantëve

Ata marshuan duke mbajtur në duar banderola, ku shkruhej “Të drejtat e njeriut nuk njohin kufinj” dhe “Asnjë qenie njerëzore nuk është e paligjshme”. Mes marshuesve kishte edhe agjentë të skuadrave të ndërhyrjes së shpejtë me uniforma.

Javët e fundit, organizata të ndryshme ndërkombëtare, mes të cilave “Amnesty International” dhe “Mjekë pa kufij”, kanë kritikuar kushtet e këqija të jetesës së mijëra refugjatëve në qendrat e pritjes.

Por, kulmi i indinjatës u arrit pas gjetjes së 71 trupave të pajetë, brenda një kamioni frigorifer të braktisur në autostradë. Më herët, në Katedralen e Vjenës u mbajt një meshë për 71 viktimat e tragjedisë, që shpalosi para gjithë botës rreziqet, me të cilat përballen emigrantët në duart e trafikantëve, kur arrijnë në Europë.

Ndërkohë, qindra refugjatë mbërritën të hënën në Vjenë në bordin e trenave që vinin nga Hungaria, me qëllim që të kalojnë kufirin me Gjermaninë pas orëve të tëra të bllokuar. Edhe në Mynih kanë mbërritur trenat e parë të refugjatëve.

Me kontrollet në kufi të eliminuara në zonën “Schengen”, emigrantët kërkojnë që të lëvizin në vendet me prosperitet më të lartë. E për shumë prej tyre, Kancelarja gjermane Angela Merkel është heroina e vërtetë.

Gjermania ka pranuar më shumë kërkesa për azil se çdo vend tjetër i BE-së, pavarësisht një debati të ashpër politik në vend, ndërkohë që kancelarja ka përsëritur apelet drejtuar shteteve të tjera për të bërë më shumë.

Top Channel