HRW: Gazetarët në Ballkan, punë në kushte të vështira

15/07/2015 00:00

Gazetarët në Ballkanin Perëndimor janë të detyruar të punojnë në një mjedis armiqësor, që ndikon në mënyrë të drejtpërdrejtë në aftësinë e tyre për të zhvilluar një gazetari kritike dhe të pavarur, pjesë thelbësore kjo e një shoqërie demokratike.

Kështu deklaron organizata Human Rights Watch, në një raport të publikuar këtë të mërkurë e të publikuar nga Radio Europa e Lirë.

“Autoritetet në Bosnjë Hercegovinë, Kosovë, Mal të Zi dhe Serbi duhet të ndërmarrin hapa të menjëhershëm për të krijuar një mjedis të sigurt për veprimtarinë e medieve dhe t’i japin fund mosdënimit të krimeve kundër gazetarëve”, theksohet në raport.

Raporti prej 69-faqesh, me titull “Një Profesion i Vështirë: Liria e Medias nën Sulm”, dokumenton sulme fizike dhe kërcënime, duke përfshirë edhe ato me vdekje, ndëshkime në formën e paditjeve në gjykatë dhe fushata përgojuese kundër gazetarëve në Bosnjë Hercegovinë, Kosovë, Malin e Zi dhe Serbi.

Raporti, të cilit i referohet “REL”, bazohet në intervista me 86 gazetarë, të cilët raportojnë mbi çështje delikate si krimet e luftës dhe korrupsioni nga të katër vendet e Ballkanit Perëndimor.

Human Rights Watch dokumenton edhe disa raste sulmesh nëpërmjet internetit kundër medieve online që kanë mbajtur pozicione kritike ndaj qeverive. “Asnjë nga vendet nuk është duke i hetuar apo kaluar në proces penal sulmet kundër gazetarëve në fjalë”, vijon raporti.

Top Channel