Dy kisha tepër të rëndësishme, objekte monument kulture, do të kenë shumë shpejt jo vetëm një imazh të ri në sytë e vizitorëve, por do të dalin nga rreziku i rrënimit.
E gjitha kjo falë fillimit të punës për restaurimin e tyre nga specialistë të Drejtorisë Rajonale të Kulturës në Berat. Me fonde të kësaj drejtorie kanë nisur punimet për Kishën e Vangjelizmit në lagjen “Kala”.
“Është një monument kulture i kategorisë së dytë dhe që i përket shekullit të XVIII. Ka qenë një momument i rrezikuar deri në ditët që flasim. Për këtë kemi hartuar një projekt mirëmbajtjeje dhe jemi në momentet e restaurimit të çatisë. Më pas do vazhdojmë me muret dhe hidroizolimin, që është i rëndësishëm sepse ndikon në jetëzgjatjen e monumentit. Gjithashtu, do të restaurojmë tavanin që është i degraduar, por do të bëjmë dhe pastrimin e territorit”, thotë kreu i Drejtorisë Rajonale të Kulturës, Eugen Kallfani.
Restaurimi tjetër është ai i Kishës së Shën Triadhës, një objekt i kategorisë së parë me vlera të papërsëritshme, ku do të punohet për çatinë, – saktëson Kallfani.
Me këto fonde të vetë Drejtorisë për mirëmbajtjen parashikohet të ketë më pak problematika sa i përket degradimit të këtyre vlerave, por dhe nxjerrjen e tyre në dritë për sytë e vizitorëve.
Top Channel