PD: Rama mbron dhunën ndaj medias

“Thamë se një kryeministër normal dhe europian do ta dënonte aktin, sidomos të vartësit partiak, dhe ndoshta do ta tërhiqte atë nga gara. Besonim gjithashtu se Edi Rama, si përherë në kësi rastesh, do të bënte syrin qorr e veshin shurdh. Por u gabuam me të dy parashikimet, pasi Rama as nuk e qortoi satrapin lokal që ka ngulur në Elbasan dhe as nuk heshti që skandali të harrohej”, ka thënë deputeti Genc Pollo.

Sipas tij, Edi Rama, publikisht, me zë e figurë, e mori në mbrojtje Qazim Sejdinin, “duke u dëshmuar sërish se është ai frymëzuesi i shantazhimit të medias dhe rreziku kryesor i lirisë së shprehjes”.

“Ky qëndrim i Edi Ramës është prova direkte se në rang vendi, me kapjen e rregullatorit AMA dhe me ndarjen antiligjore të frekuencave numerike, si dhe me kërcënimet me tatime e me arrestime, dyshja Rama-Meta ka futur tashmë në vathë shumicën e mediave në këtë vend”, ka shtuar Pollo.

Sipas tij, i inkurajuar nga mbrojta e Edi Ramës, Qazim Sejdini po heton privatisht që të gjejë e të ndëshkojë se kush e nxori zbuluar.

“Në fakt, ky është modeli i regjimit censurë Rama-Meta dhe Qazim Sejdini thjesht po ndjek me fanatizëm e kënaqësi stilin e shefave të tij. Ne përshëndesim dënimin e qartë e pa ekuivok ditën e djeshme ndaj aktit censurë të Qazim Sejdinit nga dy shoqatat e gazetarëve të Shqipërisë”, ka shtuar Pollo.

Top Channel