Tre gola në 12 minuta. Djordjevic që barazon pas golit të Iturbes, ndërsa gjithçka mbyllet në minutën e 85 me Yanga-Mbiwa. Kështu, Roma fiton derbin me Lazion 2-1 dhe siguron vendin e dytë, atë të nënkampionit që i garanton kualifikim direkt në fazën e grupeve të Champions League.
Ndërkohë, Pioli rrezikon shumë, pasi i jep një shpresë Napolit, skuadër me të cilën do luaj sfidën e fundit të kampionatit, që do jetë si një finale për biletën e fundit të Champions-it.
Goli i parë i ndeshjes erdhi në minutën e 73 nga Iturbe që shënon pas një aksioni të bukur nisur nga këmbët e Nainggolan dhe Pjanic. Por, gjithçka u barazua në minutën e 81, ku sulmuesi serb Djordjevic shënon pas një krosimi nga Felipe Anderson.
Kur u mendua se skuadrat ishin pajtuar për një barazim që do dërgonte të dyja në Champions, frikën e të cilit e kishte edhe Napoli, në skenë doli mbrojtësi Yanga-Mbiwa që shënon për 2-1.
Lacialët do të udhëtojnë në “Sao Paolo” për të zhvilluar ndeshjen e jetës, ndërsa janë më të favorizuar se skuadra e Benitez së cilës i duhen me patjetër tre pikë nëse dëshiron të luajë në garën më prestigjioze europiane, ndërsa kryeqytetasit udhëtojnë për të paktën një barazim.
Top Channel
