Komunitetet fetare të Elbasanit janë bashkuar në një deklaratë drejtuar kryeministrit të vendit dhe kryetarit të Parlamentit në lidhje me vendimin e gjykatës për shembjen e kishës katolike Shën Piu X.
Komunitetet fetare e kanë cilësuar një rast të rëndë vendimin e gjykatës dhe një preçedent po kaq të rëndë për të gjithë objektet e kultit. Komunitetet fetare pretendojnë se vendimi i gjykatës ka të bëjë me pushtetin që zotëron familja Karaosmani.
“Rasti i famullisë Shën Piu X, që tejkalon kompetencat e një famullie të klerit katolik, është preçedent për të gjitha objektet e tjera të kultit në qytetin tonë. Ky rast cënon rëndë ushtrimin e besimit, imazhin e Shqipërisë për shkak të një të kaluare represive ndaj klerit, si dhe dhunon të drejtën themelore të ushtrimit të besimit. Më 5 shkurt 2015, Gjykata e Lartë vendosi lirimin e truallit nga Kisha Katolike, edhe pse ajo është pronare legjitime prej 23 vitesh. Ankesa jonë nuk ka të bëjë me mosnjohjen e vendimit të gjykatave, por duke parë sesi funksionon ligji në Shqipëri dhe duke qenë se familja që kërkon truallin është e veshur me pushtet, ne kemi dyshimin se ky është një vendim i ndikuar, jo i drejtë dhe jo transparent”, deklaroi Arben Ramkja, përfaqësues i Myftinisë së Elbasanit.
Më tej komunitetet fetare kanë paralajmëruar kryeministrin se do të informojnë tërë instiucionet klerikale në botë për të parandaluar njëherë e përgjithmonë, siç thanë ata, cënimin e objekteve të kultit në Shqipëri dhe luajtjen e herë pas hershme me ndjenat e besimtarëve.
Top Channel
